បរទេស៖ អង្គការសុខភាពពិភពលោក (WHO) បាននិយាយកាលពីថ្ងៃអាទិត្យ ទី២៨ ខែវិច្ឆិកាថា ខ្លួនមិនទាន់ច្បាស់ថា តើមេរោគកូវីដ១៩បម្លែងខ្លួនថ្មីអូមីក្រុង (Omicron) មានសមត្ថភាពឆ្លងខ្លាំងជាងប៉ុណ្ណា បើប្រៀបធៀបទៅនឹងវីរុសបម្លែងខ្លួនថ្មី SARS-CoV-2 ផ្សេងទៀត ឬថាតើវីរុសនោះបណ្តាលឱ្យមានជំងឺធ្ងន់ធ្ងរកម្រិតណានោះទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សទិន្នន័យបឋមបង្ហាញថា មានការកើនឡើងអត្រានៃអ្នកជំងឺចូលសម្រាកព្យាបាលនៅមន្ទីរពេទ្យ នៅអាហ្វ្រិកខាងត្បូង ប៉ុន្តែនេះអាចបណ្ដាលមកពីការកើនឡើងនៃចំនួនមនុស្សឆ្លង ជាជាងលទ្ធផលនៃការឆ្លងជាក់លាក់នៃមេរោគបម្លែងខ្លួនថ្មី Omicron។ ទោះជាយ៉ាងណាក៏ដោយនៅក្នុងសេចក្ដីថ្លែងការណ៍មួយ ទីភ្នាក់ងារនេះបានរំលឹកឡើងវិញថា ភស្តុតាងបឋមបង្ហាញថា អាចមានហានិភ័យខ្ពស់នៃការឆ្លងឡើងវិញពីវីរុសបម្លែងខ្លួនថ្មីនេះ។
WHO បាននិយាយថា ខ្លួនកំពុងធ្វើការជាមួយក្រុមអ្នកជំនាញបច្ចេកទេស ដើម្បីស្វែងយល់ពីផលប៉ះពាល់ធ្ងន់ធ្ងរលើវិធានការទប់ស្កាត់ ដែលមានស្រាប់ប្រឆាំងនឹងជំងឺ COVID-19 រួមទាំងវ៉ាក់សាំងផងដែរ។ បច្ចុប្បន្នមិនមានព័ត៌មានណាមួយនៅឡើយទេ ដែលបង្ហាញថារោគសញ្ញាដែលទាក់ទងនឹងមេរោគបម្លែងខ្លួនថ្មី Omicron មានភាពខុសប្លែកគ្នាពីវីរុសបម្លែងខ្លួនថ្មីផ្សេងទៀត។
គួរឱ្យដឹងដែរថា មេរោគបំប្លែងថ្មី Omicron ត្រូវបានរកឃើញដំបូងនៅអាហ្វ្រិកខាងត្បូងកាលពីដើមខែនេះ ហើយទន្ទឹមនឹងនេះ ក្រុមអ្នកជំនាញបាននឹងកំពុងបន្តធ្វើការសិក្សា ដើម្បីកំណត់ថាតើ វាមានឥទ្ធិពលណាមួយទៅលើ ឧបករណ៍ធ្វើតេស្តរហ័សដែរ ឬយ៉ាងណា៕