មានរឿងអ្វី? កីឡាករ Man UTD ខ្លះមិនសប្បាយចិត្តនឹងព័ត៌មាននៃការតែងតាំងលោក Rangnick ទេ

អង់គ្លេស៖ យោងតាមសេចក្ដីរាយការណ៍ កីឡាករនៅក្លិបបិសាចក្រហម Manchester United ខ្លះមានការមិនសប្បាយចិត្តនឹងព័ត៌មាននៃការតែងតាំងលោក Ralf Rangnick ជាគ្រូបង្វឹកបណ្ដោះអាសន្នដោយសារតែពួកគេមិនត្រូវបានថ្នាក់លើក្លិបជូនដំណឹងពីរឿងនេះជាមុន។

អ្នកកាសែត Fabrizio Romano និងប្រភពជាច្រើនទៀតបានបង្ហើបថា Manchester United និងលោក Rangnick បានឈានដល់កិច្ចព្រមព្រៀងហើយដោយលោកគ្រូបង្វឹកសញ្ជាតិអាល្លឺម៉ង់រូបនេះនឹងមកដឹកនាំនៅ Old Trafford រយៈពេល៦ខែ ហើយផុតពី៦ខែនេះគឺលោកនឹងកាន់តំណែងខាងទីប្រឹក្សារបស់ក្លិបរយៈពេល២ឆ្នាំទៀត។

មកទល់ពេលនេះក្លិបពុំទាន់បានប្រកាសជាផ្លូវការនោះទេប៉ុន្តែកីឡាករក្នុងក្រុមមានអារម្មណ៍មិនសូវពេញចិត្តដែលពួកគេដឹងរឿងនេះក្រោយប្រព័ន្ធផ្សព្វផ្សាយ។ សារព័ត៌មាន The Daily Star បានបង្ហើបថាគ្មាននរណាម្នាក់ប្រាប់ទៅកីឡាករក្នុងក្រុមតាម Whatsapp នោះឡើយ។

យ៉ាងណាមិញ លោក Ralf Rangnick ត្រូវបានគេរំពឹងទុកថានឹងដឹកនាំក្លិប Manchester United ប្រកួតទល់នឹង Arsenal នៅថ្ងៃទី៣ខែធ្នូខាងមុខនេះហើយ៕

ប្រភព៖ mirror