អ្នកថតរូបនៅរមណីយដ្ឋានអង្គរបារម្ភបាត់ចំណូល ខណៈភ្ញៀវទេសចរបច្ចុប្បន្នប្រើទូរស័ព្ទថតរូប - Khmerload

អ្នកថតរូបនៅរមណីយដ្ឋានអង្គរបារម្ភបាត់ចំណូល ខណៈភ្ញៀវទេសចរបច្ចុប្បន្នប្រើទូរស័ព្ទថតរូប

https://s9.kh1.co/d0/d0a80eb98355093ab03b709a0d960de8f2dba1df.jpg
សង្គម
 25-Nov-2021 1pm · 10 days ago

អ្នកថតរូបជាច្រើននាក់ បានសម្តែងពីក្តីបារម្ភពីរឿងប្រាក់ចំណូលខ្លួន ដោយភ្ញៀវទេសចរភាគច្រើនប្រើប្រាស់ទូរស័ព្ទថតរូប ដោយមិនប្រើប្រាស់សេវាថតរូបដោយប្រើប្រាស់ឧបករណ៍កាំមេរ៉ានោះឡើយ។

សៀមរាប៖ មិនថានៅក្នុងពេលអតីតកាល និងបច្ចុប្បន្ននោះទេ ចំនួនអ្នកថតរូបជាច្រើននាក់ដើរកាន់កាំមេរ៉ា ស្ពាយកាតាបពីក្រោយ ក្នុងបរិវេណរមណីយដ្ឋានអង្គរ។ ជាងថតមួយចំនួនតូចកំពុងថតរូបឱ្យអ្នកទេសចរ ខណៈអ្នកខ្លះទៀតបានត្រឹមអង្គុយក្បែរសួនស្រែកហៅភ្ញៀវឱ្យប្រើសេវារបស់ខ្លួន។ ប៉ុន្តែភ្ញៀវទេសចរបដិសេធ ព្រោះពួកគេមានទូរស័ព្ទផ្ទាល់ខ្លួន ដែលអាចផ្ដិតយករូបភាពតាមអ្វីដែលខ្លួនចង់បាន។ ការណ៍នេះធ្វើឱ្យអ្នកថតរូប នៅរមណីយដ្ឋានអង្គរបារម្ភបាត់បង់របរនេះ។

ដោយឡែក ចូលមកដល់ពេលមានវត្តមានជំងឺកូវីដ១៩ បូករួមនឹងការរីកចម្រើននៃបច្ចេកវិទ្យា ធ្វើឱ្យជាងថតរូបខ្លះនៅរមណីយដ្ឋានអង្គរស្ទើរតែបាត់បង់ចំណូលទាំងស្រុង។ ភ្ញៀវទេសចរភាគច្រើន មានទូរស័ព្ទដៃទំនើបផ្ទាល់ខ្លួន ដែលអាចថតរូបឱ្យគ្រួសារ និងខ្លួនឯងបាន។ ភ្ញៀវទេសចរនាពេលបច្ចុប្បន្នមិនសូវនិយម ឱ្យជាងថតរូប ថតឱ្យនិងយករូបថតជាសន្លឹកនោះទេ។ អង្គុយនៅសួនច្បារ មុខប្រាសាទអង្គរវត្តតាំងពីម៉ោងប្រហែល៨ព្រឹក​ ដល់ថ្ងៃបាក់រសៀល ជាងថតរូបខ្លះមិនទាន់មានភ្ញៀវមួយផង។​
អ្នកថតរូបខ្លះទៀត អាចរកចំណូលបានបន្តិចបន្តួចនាពេលបច្ចុប្បន្ន ​តែពួកគេនៅបន្តប្រកបរបរនេះ។ ជាក់ស្ដែងរបរថតរូបក្នុងរមណីយដ្ឋានអង្គរ បានចិញ្ចឹមគ្រួសារលោក ឆ្លង សាវិន តាំងពីឆ្នាំ២០១៧មកម៉្លេះ​។ ដ្បិតលោកមិនសូវរកចំណូលបានច្រើនពីការថតរូប តែលោកមិនបោះបង់ការងារនេះទេ។ លោក ឆ្លង សាវិន​ ថា ការងារថតរូប ជាការងារមួយស្រាល និងមិនសូវហត់ដូចធ្វើការសំណង់ ម្យ៉ាងលោកមានអនុស្សាវរីយច្រើននៅរមណីយដ្ឋានអង្គរនេះ។  

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាងថតរូបម្នាក់ដើរចេញពីប្រាសាទអង្គរវត្ត ជាមួយដៃកាន់កាមេរ៉ាមួយ លោក មន់​ ដេ រៀបរាប់ថា៖ 

«ភ្ញៀវទេសចរខ្លះគាត់ចង់បានរូបភាពសន្លឹកគាត់ក៏ហៅពួកខ្ញុំជាជាងថតរូបឱ្យថត​ តែអ្នកខ្លះគាត់ក៏ប្រើទូរស័ព្ទថត។ អ្នកគាំទ្រការថតរូបនៅមានតិចតួច។ បើអត់មានភ្ញៀវខ្ញុំប្រហែលជាត្រូវទៅធ្វើការស៊ីឈ្នួលគេវិញ»

មន់​ ដេ


យ៉ាងណាមិញ ការប៉ះពាល់ដោយសារជំងឺកូវីដ១៩ ជាបញ្ហាមួយ តែអ្វីដែលពិបាកនឹងដោះស្រាយនោះគឺ ការវិវត្តនៃបច្ចេកវិទ្យាថតរូប ដែលជំរុញឱ្យទេសចរជ្រើសរើសថតរូបតាមទូរស័ព្ទដៃដោយខ្លួនឯង។ មូលហេតុទាំងអស់នេះ ធ្វើឱ្យលោក មន់ ដេ និង លោក ឆ្លង សាវិន បារម្ភខ្លាចបាត់បង់អាជីពដែលចញ្ចឹមគ្រួសាររបស់លោក៕

ប្រភព៖ ថ្មីថ្មី

សូមចូលទស្សនារូបភាពខាងក្រោម៖

https://s9.kh1.co/__image/w=650,h=488,q=100/ff/ff1ab4b9ee522fd2b87f2c0f55c495aa286534c9.jpg
  លោក មន់ ដេ
https://s9.kh1.co/__image/w=650,h=488,q=100/0f/0fcb5259860ec91a5934b2ca6054ac9b56e31555.jpg
លោក ឆ្លង សាវិន
https://s9.kh1.co/__image/w=650,h=433,q=100/db/db70acbc9af3fbe09e5cf52da637fdd564bc2b5d.jpg
ភ្ញៀវទេសចរមកកម្សាន្តប្រាសាទអង្គវត្ត
Ly Rothpanha
P.H

អត្ថបទទាក់ទង