អង់គ្លេស៖ លោក Peter Crouch គិតថា លោកគ្រូបង្វឹក Ole Gunnar Solskjaer ត្រូវអ្នកគាំទ្របិសាចក្រហម Manchester United រិះគន់ខ្លាំងក៏ព្រោះតែលោកមិនមានបទពិសោធន៍ដឹកនាំក្លិបល្បីៗដូចលោក Thomas Tuchel, Pep Guardiola និង Jurgen Klopp ។
បើទោះបីជាលោកបានដឹកនាំឲ្យ Man United យកឈ្នះ Atlatanta ៣ ទល់នឹង២ ក្នុងក្របខណ្ឌ Champions League កាលពីយប់ថ្ងៃទី២១ខែតុលាកន្លងទៅនេះក៏ដោយ ក៏លោកនៅតែរងសំពាធនិងការរិះគន់ ដោយសារព័ត៌មានមួយចំនួនបានចុះផ្សាយថាលោកអាចនឹងត្រូវគេបញ្ចប់តំណែងនាពេលឆាប់ៗព្រោះលោកបានដឹកនាំក្រុមឲ្យចាញ់ដល់ទៅ៤ប្រកួត ក្នុងចំណោម៧ប្រកួតចុងក្រោយ។
ដូច្នេះលោក Crouch គិតថា Solskjaer ទទួលបានការរិះគន់ឥតល្ហែរាល់ពេលដែលក្រុមចាញ់ការប្រកួតក៏ដោយសារតែអ្នកគាំទ្រ Man UTD យកលោកទៅប្រៀបធៀបនឹងគ្រូបង្វឹករបស់ក្លិប Man City, Chelsea និង Liverpool ដែលគ្រូបង្វឹកទាំងបីរូបនេះសុទ្ធតែធ្លាក់ដឹកនាំក្លិបធំៗដូចជា Barcelona, PSG និង Borussia Dortmund ជាដើម។