អាយុច្រើន ស្ទើរតែគ្មានសង្ឃឹម! ម្ដាយកូនបង់ក្លាដែស បានជួបគ្នាវិញ ក្រោយពីបែកគ្នារយៈពេលជាង៧០ឆ្នាំ

បង់ក្លាដែស៖ បុរសជនជាតិបង់ក្លាដែសម្នាក់ឈ្មោះថា Abdul Kuddus Munsi អាយុ៨២ឆ្នាំ ដែលទីបំផុតគាត់បានជួបជុំជាមួយម្ដាយអាយុជិត១០០ឆ្នាំរបស់គាត់វិញហើយកាលពីថ្មីៗនេះ ក្រោយពីបែកគ្នាអស់រយៈពេលជាង៧០ឆ្នាំ។

តាមប្រភពនៃអត្ថបទដើមបានឲ្យដឹងថា បុរសជាកូនប្រុសបានកើតនៅឆ្នាំ១៩៣៩ ហើយលុះពេលគាត់មានអាយុ១០ឆ្នាំ គាត់ត្រូវបានបញ្ជូនឲ្យទៅរស់នៅជាមួយពូរបស់គាត់ តែមិនយូរប៉ុន្មានគាត់ក៏រត់គេច និងបានបាត់បង់ទំនាក់ទំនងជាមួយគ្រួសារផ្ទាល់តែម្ដង។ បន្ទាប់មក គាត់ត្រូវបានស្ត្រីចំនួនពីរនាក់ទទួលយកទៅចិញ្ចឹមរហូតមកទល់ខែមេសា ឆ្នាំ២០២១នេះ មានបុរសជំនួញម្នាក់ បានជួយបង្ហោះវីដេអូដើម្បីស្វែងរកគ្រួសារឲ្យគាត់នៅលើបណ្ដាញសង្គម ដោយគាត់បានចងចាំនូវឈ្មោះឪពុកម្ដាយ និងភូមិដែលធ្លាប់រស់នៅផងដែរ។

តួយ៉ាងសាច់ញាតិរបស់គាត់នៅក្នុងភូមិបានឃើញពីការបង្ហោះនេះ និងបានទាក់ទងទៅកាន់គាត់ផ្ទាល់ ដោយប្រាប់ថាម្ដាយរបស់គាត់នៅរស់រានមានជីវិត ដែលធ្វើឲ្យគាត់មានអារម្មណ៍សប្បាយរីករាយជាខ្លាំង និងធ្វើដំណើរចម្ងាយប្រមាណ៣៥០គីឡូម៉ែត្រ ដើម្បីបញ្ចប់ការឃ្លាតឆ្ងាយជាមួយម្ដាយ។

យ៉ាងណាមិញ នៅពេលបានជួបគ្នាវិញ ម្ដាយរបស់គាត់ក៏បានបញ្ជាក់ដែរថា គាត់ពិតជាកូនប្រុសដែលបានឃ្លាតឆ្ងាយតាំងពីក្មេងវ័យពិតប្រាកដមែន ដោយសារតែចំណាំស្នាមនៅលើដៃ៕

ប្រភព: Daily Mail

សូមទស្សនារូបភាពខាងក្រោម៖