ចង់ឆ្ងាញ់មាត់ រៀនផ្សំគ្រឿង ស៊ុបតុងយាំ តាមរូបមន្តបែបថៃដែលគេពេញនិយម

អាហារ៖ នៅប្រទេសថៃអាហារមួយមុខនេះល្បីល្បាញណាស់ ក៏ព្រោះតែវាជាស៊ុបដែលមានរសជាតិមុតផ្សំជាមួយនឹងគ្រឿងទេសជាច្រើនមុខ បន្ថែមជាមួយនឹងគ្រឿងសមុទ្រដូចជាមឹក បង្គារ ឬដាក់សាច់គោ សាច់ជ្រូក មាន់ក៏បាន។ ជាពិសេស គេតែងតែដាក់មីកញ្ចប់ចូលជាមួយ ស៊ុបតុងយាំ  នេះដែលធ្វើឲ្យមានជាតិកាន់តែឆ្ងាញ់។

គ្រឿងផ្សំ៖

១. ខ្ទឹមក្រហម រំដេង គល់ស្លឹកគ្រៃ ស្លឹកក្រូច 

២. ម្ទេសស្អិត chili paste ២ស្លាបព្រាបាយ

៣​. ម្សៅស៊ុបរសជាតិសាច់ជ្រូក ១ស្លាបព្រាកាហ្វេ

៤. ស្ករស ១ស្លាបព្រាបាយ

៥. ទឹកត្រី និងទឹកក្រូចឆ្មា ៥ស្លាបព្រាបាយ

៦. ទឹកដោះគោខាប់ ៤ស្លាបព្រាបាយ

៧. ស្លឹកជីរណា ផ្លែក្រូចឆ្មា

៨. បង្គា មឹក សាច់ក្ដាម ស្រុះឲ្យឆ្អិន

៩. មីកញ្ចប់ ពងទា 

១០. ទឹក ចំនួន ៦០០ មីលីលីត្រ ឬ ៤ពែង

របៀបចម្អិន៖ 

១. យកគ្រឿងមកហាន់ជាដុំល្មម មានដូចជា ខ្ទឹមក្រហម រំដេង គល់ស្លឹកគ្រៃ ចំណែកឯស្លឹកក្រូចត្រូវហែកវាឲ្យស្អាត បន្ទាប់មកដាក់គ្រឿងទាំងនេះចូលក្នុងឆ្នាំង ហើយដាំវាឲ្យរៀងពុះបន្តិចចាប់ផ្ដើមដាក់ទឹកត្រី ទឹកក្រូចឆ្មា ស្ករសចូល រួចរងចាំឲ្យវាពុះល្អ។

២. ពេលទឹកពុះហើយ ហែកមីដាក់ចូលទុកឲ្យវារៀងទន់បន្តិច កូរវាឲ្យសព្វហើយបិទភ្លើង។ បន្ទាប់មកគោះពងទាយកតែផ្នែកពណ៌សដាក់ចូល ដាក់ទឹកដោះគោខាប់ហើយកូរវាម្ដងទៀត។

៣. ចាក់ស៊ុបនោះដាក់ចាន យកបង្គា មឹក សាច់ក្ដាម ដែលស្រុះឆ្អិនមកដាក់ពីលើស៊ុបហើយដាក់ជាមួយនឹងស្លឹកជីរណា ហាន់ផ្លែក្រូចឆ្មាជាចំណិតៗដាក់ពីលើដើម្បីបង្កើនសោភ័ណ្ឌភាពជាការស្រេច៕

ប្រភពពី៖ Kapook