ឥណ្ឌា បង្កើតព្រះកូរ៉ូណាពីរអង្គ ទុកសម្រាប់បួងសួងសុំឲ្យចៀសឆ្ងាយពីជំងឺកូវីដ-១៩

ឥណ្ឌា៖ ក្រុមអាចារ្យហិណ្ឌូ នៅវិហារ Kamatchipuri Adhinam បានបួងសួងទៅកាន់ព្រះកូរ៉ូណាចំនួនពីរអង្គជារៀងរាល់ថ្ងៃ ជាកិច្ចប្រឹងប្រែងទប់ទល់នឹងជំងឺរាតត្បាតកូវីដ-១៩ ខណៈប្រទេសកំពុងរងការឆ្លងរាលដាលយ៉ាងខ្លាំង។

រូបចម្លាក់ព្រះចំនួនទាំងពីរអង្គនេះ ហៅថា “Corona Devi” ត្រូវបានគេរៀបចំឡើងនៅភាគខាងត្បូងនៃទីក្រុង Coimbatore ប្រទេសឥណ្ឌា ដែលរងការវាយប្រហារយ៉ាងធ្ងន់ធ្ងរពីជំងឺកូវីដ-១៩ ដោយបានសម្លាប់មនុស្សជាង១០០,០០០នាក់ទូទាំងប្រទេសក្នុងរយៈពេលបួនសប្តាហ៍ចុងក្រោយនេះ។

បើទោះជាពេលនេះ វិហារត្រូវបានបិទទ្វារក៏ដោយ ក៏ខាងក្រុមអាចារ្យនាំគ្នាគោរពនៅពីមុខព្រះកូរ៉ូណាទាំងពីរអង្គ ដែលមួយអង្គធ្វើឡើងពីថ្ម និងមួយអង្គទៀតធ្វើឡើងពីឈើ។ ហើយអាចារ្យ បានថ្វាយអាហារ សូត្រធម៌បួងសួងដើម្បីបញ្ឈប់ជំងឺរាតត្បាត និងស្រង់ទឹករមៀត ទឹកដោះគោដល់ព្រះផងដែរ។

យ៉ាងណា ក្រុមអាចារ្យ នឹងបួងសួងដល់ព្រះកូរ៉ូណាទាំងពីរអង្គបន្ដទៀត ចំនួន៧សប្ដាហ៍បន្ថែម ដោយសង្ឃឹមថាអ្វីៗនឹងអាចល្អប្រសើរ។ ហើយបើយោងតាមសារព័ត៌មាន Worldometer បានឲ្យដឹងដែរថា ប្រទេសឥណ្ឌាមានអ្នកឆ្លងកូវីដ-១៩សរុបចំនួនជាង២៧លាននាក់ ស្លាប់៣១៨,៨២១នាក់ និងជាសះស្បើយជាង២៤លាននាក់ គិតត្រឹមព្រឹកថ្ងៃសុក្រនេះ៕

សូមទស្សនារូបភាពខាងក្រោម៖

ដើម្បីទទួលបានព័ត៌មានបន្ថែម និងរហ័ស សូមចុច៖ https://t.me/khmerload

ប្រភព: deccanherald.com / worldometers.info