ថ្លៃកប់ក្ដោង! បែកធ្លាយ Man City គ្រោងអន្ទងចិត្ត Messi ដោយហ៊ានផ្តល់ថ្លៃនឿយហត់ក្នុងមួយសប្តាហ៍រហូតដល់ទៅ...

អង់គ្លេស៖ តាមសេចក្តីរាយការណ៍បានឱ្យដឹងថា ក្លិប Manchester City ត្រូវបានបែកធ្លាយគម្រោងមួយ ដែលពួកគេគ្រោងបើកកញ្ចប់លុយធំ ដោយហ៊ានផ្តល់ថ្លៃនឿយហត់ទៅឱ្យកីឡាករ Lionel Messi ក្នុងមួយសប្តាហ៍រហូតដល់ទៅ ៥០ ម៉ឺនផោន ឬស្មើនឹង (៧០ ម៉ឺនដុល្លាអាមេរិក) ដើម្បីចងចិត្តយកខ្សែប្រយុទ្ធសញ្ជាតិអាហ្សង់ទីននារដូវក្តៅខាងមុខនេះ។

យ៉ាងណាមិញ Messi ត្រូវបានគេដឹងថា អាចមានឱកាសចាកចេញពីទឹកដី Camp Nou ដោយគ្មានតម្លៃខ្លួននាដំណាច់ខែមិថុនាខាងមុខនេះហើយ ប៉ុន្តែយោងតាមតាមការចុះផ្សាយពីសំណាក់សារព័ត៌មានមួយចំនួនបានឱ្យដឹងថា ខ្សែប្រយុទ្ធវ័យ ៣៣ ឆ្នាំនឹងបន្តកុងត្រាថ្មីជាមួយ Barca ជាបន្តទៀត។

ទោះបីជាយ៉ាងណាក៏ដោយ អនាគតរបស់ខ្សែប្រយុទ្ធឆ្នើមរូបនេះគឺមិនទាន់មានការសម្រេចផ្លូវការណាមួយនៅឡើយទេ ស្របពេលដែលក្រុម Man City កំពុងតែតាមដានអំពីព័ត៌មានរបស់ Messi យ៉ាងយកចិត្តទុកដាក់។

ដកស្រង់ពីប្រភពសារព័ត៌មានដ៏ល្បីមួយដែលមានឈ្មោះថា The Sun បានចុះផ្សាយថា ក្លិបម្ចាស់ជើងឯក Premier League បានរៀបចំសំណើ ដោយហ៊ានផ្តល់ថ្លៃនឿយហត់ទៅឱ្យ Messi ក្នុងមួយសប្តាហ៍រហូតដល់ទៅ ៥០ ម៉ឺនផោន ឬស្មើរនឹង (៧០ ម៉ឺនដុល្លាអាមេរិក) ក្រោយពីបង់ពន្ធរួច ដើម្បីចងចិត្តខ្សែប្រយុទ្ធកំពូលមកពីទ្វីបអាមេរិកខាងត្បូងរូបនេះ ផ្ទេរមកកាន់ទឹកដី Etihad Stadium។

តាមរបាយការណ៍ដដែលបានអះអាងថា ខ្សែប្រយុទ្ធខាងលើនឹងបើកកិច្ចចរចារកុងត្រារយៈពេល ១ រដូវកាលជាមួយនឹងលោក Pep Guardiola ហើយក្នុងនោះពួកគេក៏មានសិទ្ធបន្តកុងត្រាថ្មីរយៈពេល ១២ ខែបន្ថែមទៀតផងដែរ៕

ប្រភព៖ SportsMole

  Join us📲 : https://t.me/keylatop ដើម្បីទស្សនាវីដេអូហាយឡាយ EPL កម្រិតច្បាស់ និងព័ត៌មានកីឡាសម្បូរបែប