លោក Solskjaer សង្ឃឹមថា Maguire នឹងអាចលេងនៅវគ្គផ្តាច់ព្រ័ត្រ EL បន្ទាប់ពីរបួសកជើង

អង់គ្លេស៖ គ្រូបង្វឹករបស់ក្រុមបិសាចក្រហម Manchester United គឺ លោក Ole Gunner Solskjaer បានបង្ហាញពីក្តីសង្ឃឹមរបស់លោកថា កីឡាករខ្សែការពារសញ្ជាតិអង់គ្លេស Harry Maguire នឹងអាចចូលរួមលេងនៅវគ្គផ្តាច់ព្រ័ត្រពានរង្វាន់ UFFA Europa League បន្ទាប់ពីមានបញ្ហារបួសកជើង។

គួរបញ្ជាក់ផងដែរថា កីឡាករប្រធានក្រុមរបស់បិសាចក្រហម Manchester United រូបនេះបានជួបប្រទះនឹងបញ្ហារបួសកជើងនៅក្នុងជំនួបប្រកួតជាមួយក្រុម Aston Villa ហើយត្រូវបានផ្តូរចេញភ្លាមបន្ទាប់ពីកីឡាកររូបនេះមិនអាចបន្តការប្រកួតបាន ហើយក្នុងជំនួបប្រកួតនេះបិសាចក្រហមបានយកឈ្នះទៅលើក្រុម Aston Villa នៅក្នុងលទ្ធផល3-1 ។​ បច្ចុប្បន្នកីឡាករខ្សែការពារសញ្ជាតិអង់គ្លេសរូបនេះបានដើរតួយ៉ាងសំខាន់នៅក្នុងតំបន់ការពាររបស់ក្រុមដែលជាខែលការពារយ៉ាងមាំសម្រាប់ក្រុម Man Utd នៅរដូវកាលនេះ។

ក្រុមបិសាចក្រហម Manchester United ក៏នឹងត្រូវមានការប្រកួតពានរង្វាន់មួយដ៏ធំផងដែរគឺ ពានរង្វាន់ UFFA Europa League នៅថ្ងៃទី២៦ ឧសភាជាមួយក្រុមដែលមកពីប្រទេសអេស្ប៉ាញ Villarreal ។ បន្ថែមលើក្តីសង្ឃឹមរបស់លោក គ្រូបង្វឹកសញ្ជាតិន័រវេសបានបង្ហាញពីក្តីព្រួយបារម្ភថា​ Harry Maguire អាចនឹងខកខានការប្រកួតដែលនៅសល់ក្នុងក្របខណ្ឌ Premier League ប៉ុន្តែលោកនៅតែជឿជាក់ថា រូបគេអាចជាសះស្បើយទាន់ការប្រកួតជាមួយក្រុម Villarreal ៕