Bayern ប្រកាសថាក្លិបណាចង់បានតារាឆ្នើមរូបនេះត្រូវបោះលុយយ៉ាងតិច ៦៩លានលើតុ

អាល្លឺម៉ង់៖ យោងតាមការរាយការណ៍ ក្លិប Bayern Munich បានប្រកាសថាក្លិបណាដែលចង់ខ្សែប្រយុទ្ធ Robert Lewandowski ត្រូវចំណាយយ៉ាងតិចណាស់ក៏ ៦៩លានផោន(ស្មើនឹងប្រមាណ៩៥.៧លានដុល្លារ) ខណៈដែលក្លិបបិសាចក្រហម Manchester United ធ្លាប់តាមទិញយកកីឡាករសញ្ជាតិប៉ូឡូញរូបនេះកាលជំនាន់ Sir Alex Ferguson នៅដឹកនាំ។

បើទោះបីជា Lewandowski ចាត់ទុកថាជាខ្សែប្រយុទ្ធជួរមុខលើពិភពលោកមួយរូបក៏ថ្មីៗនេះ មានពាក្យចចាមអារ៉ាមថាគេអាចនឹងចាកចេញពីទឹកដី Allianz Arena មុនពេលទីផ្សារដោះដូរកីឡាករនារដូវក្ដៅបើកឡើង។

កាលពីរដូវកាលមុន Lewandowski បានក្លាយជាកីឡាករជួរមុខដែលរកគ្រាប់បាល់បានច្រើនបំផុត និងថែមទាំងបានជួយក្រុម Bayern Munich លើកពាន Bundesliga, DFB-Pokal និង Champions League ទៀតផង។មិនត្រឹមតែប៉ុណ្ណោះ រូបគេបានឈ្នះពានរង្វាន់ FIFA Best Player of The Year កាត់មុខកំពូលខ្សែប្រយុទ្ធ Cristiano Ronaldo និង Lionel Messi ផងដែរ។

ចំណែកឯនៅរដូវកាលនេះ កីឡាករវ័យ៣៣ឆ្នាំរូបនេះរកបាន៣៦គ្រាប់ក្នុងការបង្ហាញខ្លួន២៦ប្រកួតក្នុងក្របខណ្ឌ Bundesliga ។

អ្នកកាសែតមកពី Sky Sports ឈ្មោះ Marc Behrenbeck បានឲ្យតម្រុយថា មានក្លិបពីរបីដែលចង់បាន Lewandowski ប៉ុន្តែគេមិនទាន់អាចបង្ហាញឈ្មោះបានឡើយ ដឹងតែត្រឹមថាក្នុងក្លិបទាំងអស់នោះក៏មាន Manchester United ផងដែរ៕

ប្រភព៖ express

ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖

https://t.me/khmerload