ស្អាតប៉ុណ្ណាទៅ? គ្រាន់តែឯកសណ្ឋាន Man UTD រដូវកាលថ្មីចេញភ្លាម ហ្វេនៗនាំគ្នាបោះពាក្យសរសើរភ្លូកទឹកភ្លូកដី

អង់គ្លេស៖ ប្រិយមិត្តអ្នកគាំទ្ររបស់ក្រុមបិសាចក្រហម Manchester United បាននាំគ្នាកោតសរសើរឈុតឯកសណ្ឋានទាំងក្នុងដីនិងក្រៅដីរបស់ក្លិបសំណព្វចិត្តពួកគេ ដែលបានបែកធ្លាយតាមគណនី NI Classic Shirt Co ក្នុងបណ្ដាញសង្គម Twitter។

ក្រៅពីឈុតក្នុងដីនិងក្រៅដី គេក៏បានធ្វើការបង្ហោះឈុតទី៣ របស់ Manchester United ផងដែរ ដោយលើអាវអស់ទាំងនោះលែងមានពាក្យ Chevrolet ដូចមុនទៀតហើយដោយជំនួសម្ចាស់ឧបត្ថម្ភថ្មីគឺ TeamViewer ប៉ុន្តែសហការផលិតជាមួយក្រុមហ៊ុន Adidas ដដែល។

យ៉ាងណាមិញ ឈុតដែលទាក់ភ្នែកអ្នកគាំទ្របំផុតគឺឈុតក្រៅដីរបស់ Manchester United ដែលមានពណ៌សលាយពណ៌ទឹកសមុទ្ររាងជារបៀបឆ្នូតៗ ដែលគេធ្លាប់ឃើញលោក Ryan Giggs ពាក់ចន្លោះពីឆ្នាំ១៩៩០ ដល់ ១៩៩២ កាល Man UTD យកឈ្នះ Nottingham Forest ១ ទល់នឹង ០ នៅក្នុងពានLeague Cup វគ្គផ្ដាច់ព្រ័ត្រ ឆ្នាំ១៩៩២។

ឈុតឯកសណ្ឋានទី៣របស់ក្រុមគឺជាការលាយបញ្ចូលគ្នារវាងពណ៌សនិងពណ៌ខៀវ ខណៈអាវក្នុងដីគឺនៅតែមានពណ៌ក្រហមចែសពេញមួយតួអាវតែម្ដង ដោយបន្ថែមឆ្នូតពណ៌សចំនួនបីឆ្នូតនៅត្រង់ស្មាអាវ។

អ្នកគាំទ្រភាគច្រើនមានការពេញចិត្តនឹងឯកសណ្ឋានថ្មីនេះណាស់ដោយអ្នកខ្លះបានបង្ហោះសារថាវាពិតជាពិបាកក្នុងការសម្រេចចិត្តជ្រើសរើសមួយក្នុងចំណោមបីឈុតនោះណាស់ទើបពួកគេត្រូវទិញទាំងអស់។​ យោងតាមការរាយការណ៍ ឈុតអស់ទាំងនោះមានតម្លៃខ្ទង់ ៦៥ផោន(ស្មើនឹងប្រមាណ៩០ដុល្លារ)ក្នុងមួយឈុត តែបើទិញចំនួនបីឈុតគឺសរុប ១៩៥ ផោន(ស្មើនឹងប្រមាណ២៦៨ ដុល្លារ)៕

ប្រភព៖ dailymail