ម្តាយ​របស់​​វីរ​បាល់​ទាត់​ប្រេស៉ីល ​Ronaldinho ចែក​ឋាន​ទាំង​វ័យ​ក្មេង​​​​ដោយសារកូវីដ១៩

បរទេស៖ ម្តាយរបស់ Ronaldinho ឈ្មោះ Miguelina Elói Assis dos Santos បានទទួលមរណភាព​នៅ​ប្រទេស​ប្រេស៊ីលកាលពីថ្ងៃសៅរ៍ដោយសារជំងឺ Covid-19 ។

ម្តាយរបស់អតីតកីឡាកររបស់ក្លឹប Barcelona រូបនេះ ត្រូវបានគេបញ្ជូនទៅមន្ទីរពេទ្យម័យដឺដេស​ក្នុងទីក្រុងផត​តូអាល់ហ្គ្រេកាលពីខែធ្នូបន្ទាប់ពីឆ្លងជំងឺនេះ។ ប្រទេសប្រេស៊ីលដែលបានទទួលរងនូវករណីវិជ្ជមានជាង ១០ លាន​ករណីនៃវីរុស Covid-19 និងមានមនុស្សស្លាប់ជាង ២៤៥.០០០ នាក់គឺជាប្រទេសមួយដែលរងផលប៉ះពាល់ខ្លាំង​បំផុតក្នុង​កំឡុងពេលមាន​ជំងឺរាតត្បាតនេះ។ Atlético Mineiro ដែលជាក្លឹបមួយក្នុងចំណោមក្លឹបជាច្រើន​ដែលមាន​ទំនាក់ទំនងយ៉ាងជិតស្និទ្ធជាមួយ Ronaldinho គឺជាក្លឹបដំបូងគេដែលបានចូលរួមរំលែកទុក្ខ។

Ronaldinho ប្រាប់​ថាម្តាយរបស់គាត់ត្រូវបានគេនាំទៅមន្ទីរពេទ្យមុនពេលបុណ្យណូអែល។

«មិត្តភក្តិជាទីស្រឡាញ់ ម្តាយខ្ញុំមាន covid-19 ហើយយើងកំពុងប្រយុទ្ធដើម្បីឱ្យនាងឆាប់ជាសះស្បើយ។ គាត់កំពុង​យក​ចិត្ត​ទុកដាក់ខ្ពស់ទទួលការព្យាបាលល្អបំផុត។ ខ្ញុំសូមថ្លែងអំណរគុណដល់អ្នករាល់គ្នាជាមុនចំពោះ​ថាមពល​វិជ្ជមាន​ទាំងអស់ដែលអ្នកតែងតែផ្ញើ។ ដោយក្តី​ស្រឡាញ់​។ សូមរឹងមាំអ្នកម្តាយ» គាត់បានបង្ហោះលើបណ្តាញសង្គម។ បន្ទាប់ពីពីរបីខែនៃការប្រយុទ្ធប្រឆាំងនឹងវីរុសនេះ គួរឱ្យសោក​ស្តាយ​ម្តាយ​របស់ Ronaldinho មិនអាចឈ្នះការ​តស៊ូ​នេះ​​បានទេ។ សូមចូលរួមរំលែកទុក្ខផង៕