អ្នករត់កង់បីចិត្តឆៅ! គ្រាន់តែរឿងចតឡានស្ទះផ្លូវ ទាស់សម្តីគ្នាតិចតួច រហូតដល់បាញ់សម្លាប់

មានរថយន្តមួយគ្រឿងចតនៅលើផ្លូវ ដើម្បីចាំទទួលកូនពីក្នុងផ្ទះយកទៅដើរលេង ស្រាប់តែរំពេចនោះ មានម៉ូតូកង់បីឥណ្ឌាមួយបានឆ្លងកាត់។​ ទន្ទឹមនឹងនេះ ម៉ូតូកង់បីនោះស្រាប់តែស៊ីប្លេជាប់គ្នាច្រើនដង ដោយទំនងគិតថា រថយន្តនោះទើសផ្លូវគាត់ហើយ ដោយសារឃើញបែបនេះ ម្ចាស់ឡានក៏ចុះមកដើម្បីសួរនាំ តែផ្ទុយទៅវិញ អ្នកបើកបរកង់បីនោះបែរជាប្រើអំពើហឹង្សាទៅលើ ភរិយាអ្នកបើកបររថយន្តនោះ។ គួរបន្ថែមថា បើតាមអ្នកជិតខាងបានប្រាប់ឲ្យដឹងថា ផ្លូវដែលនៅសល់ក្រោយពេលចតរថយន្តនោះ គឺអាចឲ្យម៉ូតូកង់បីឆ្លងកាត់បាន តែមើលទៅម្ចាស់ម៉ូតូកង់បីនោះ ហាក់បីដូចជាបង្ករឿងស្រាប់។ពិតណាស់ ក្រោយពេលលេចឡើងនូវអំពើហឹង្សានេះរួចមក ស្រាប់តែអ្នកដែលអង្គុយផឹកស៊ីនៅជិតនោះ បានមកដល់ដើម្បីជួយឃាត់ តែក៏ផ្ទុះអំពើហឹង្សាលើអ្នកបើកបរម៉ូតូកង់បីនោះវិញ។តែក្រោយមក គេឃើញម្ចាស់ម៉ូតូស្រាប់តែខលហៅមិត្តភក្តិមក។ ជាក់ស្តែងបន្ទាប់មក គេឃើញម៉ូតមួយជិះគ្នា២ នាក់បានមកដល់ ហើយដំបូងចុះចូលសម្រួលធម្មតា តែមួយសន្ទុះមក ក៏ផ្ទុះអាវុធដែលបង្កឲ្យមានជនរងគ្រោះ ៣នាក់។ជនរងគ្រោះទាំង៣នាក់នោះ បានស្លាប់បាត់បង់ជីវិតទាំងអស់គ្នាហើយ បន្ទាប់ពីបញ្ជូនទៅដល់មន្ទីរពេទ្យលោកសង្ឃចំនួន ២នាក់ និង ១នាក់ទៀតស្លាប់នៅមន្ទីរពេទ្យរុស្ស៉ី ដោយសារស្ថានភាពរងរបួសត្រូវគ្រាប់កាំភ្លើងធ្ងន់ធ្ងរ។ ក្នុងករណីបាញ់ប្រហានោះ បានកើតឡើងនៅតាមបណ្តោយផ្លូវជាតិលេខ៣ ក្នុងខណ្ឌពោធិ៍សែនជ័យ រាជធានីភ្នំពេញ ។ជនរងគ្រោះទាំង៣នាក់នោះ ឈ្មោះ សៀក លឹម​ អាយុ ២៥ឆ្នាំ​ ស្លាប់នៅមន្ទីរពេទ្យលោកសង្ឃ, ឈ្មោះ សុខ សុីដេត អាយុ៤០ឆ្នាំ ស្លាប់នៅមន្ទីរពេទ្យលោកសង្ឃ, ឈ្មោះ បូរ​ រ៉ាភី​ អាយុ៤៦ឆ្នាំ​ ស្លាប់​នៅមន្ទីរពេទ្យរុស្សុី។ ។ទោះយ៉ាងនេះក៏ដោយសមត្ថកិច្ចមិនអាចទាន់បញ្ជាក់បានអំពីមូលហេតុពិតប្រាកដនៅឡើយទេ ដោយសមត្ថកិច្ចកំពុងតែធ្វើការស៉ើបអង្កេតលើកិច្ចការងារនោះយ៉ាងយកចិត្តទុកដាក់បំផុត៕