អាមេរិក៖ កម្មវិធីតិកតុកទទួលបានការព្យារពេលម្ដងទៀត ដើម្បីបញ្ចប់កិច្ចព្រមព្រៀងលក់អាជីវកម្មនៅអាមេរិករបស់ខ្លួន ដើម្បីចៀសវាងការហាមឃាត់។ ក្រុមហ៊ុនមេរបស់តិកតុក គឺ ByteDance បានពិភាក្សាអស់រយៈពេលជាច្រើនខែ ជាមួយក្រុមហ៊ុន Walmart និង Oracle ដើម្បីផ្លាស់ប្ដូរការគ្រប់គ្រងកម្មវិធីមួយនេះនៅសហរដ្ឋអាមេរិក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរឿងរ៉ាវទាំងនេះបានកើតឡើងតាំងពីខែសីហា ដោយផ្អែកលើសេចក្ដីណែនាំរបស់ប្រធានាធិបតី ដូណាល់ ត្រាំ ដើម្បីស្វែងរកអ្នកទិញយកកម្មវិធីនេះក្នុងរយៈពេល៩០ថ្ងៃ បើមិនអ៊ីចឹងទេ វានឹងត្រូវបិទមិនឲ្យដំណើរការនៅសហរដ្ឋអាមេរិក។ រដ្ឋាភិបាលសហរដ្ឋអាមេរិកបានចោទប្រកាន់ អំពីសន្តិសុខជាតិនៃការប្រើប្រាស់កម្មវិធីនេះ។
គណៈកម្មាធិការវិនិយោគបរទេសនៅអាមេរិក (CFIUS) បានអនុញ្ញាតឲ្យក្រុមហ៊ុន ByteDance ពន្យារពេលមួយសប្ដាហ៍ ទៅកាន់កាលបរិច្ឆេទកំណត់ចុងក្រោយថ្ងៃទី២៧ ខែវិច្ឆិកា ដែលកាលពីមុន ក៏ធ្លាប់ទទួលបានការអនុគ្រោះនៃការពន្យារពេលជាច្រើនផងដែរ។ ខាង CFIUS បាននិយាយថា ខ្លួនត្រូវការពេលវេលា ដើម្បីពិនិត្យឡើងវិញនូវការដាក់ស្នើ ដែលគណៈកម្មាធិការបានទទួលថ្មីៗនេះ។
កាលពីមុន ក្រុមហ៊ុន ByteDance បានផ្តល់ជូននូវផែនការចំនួនបួនផ្សេងគ្នាជាជម្រើស។ ក្រុមហ៊ុនមេរបស់តិកតុកបាននិយាយថា នៅក្នុងខែវិច្ឆិកា ខ្លួនមិនទទួលបានការឆ្លើយតប ពីរដ្ឋាភិបាលសហរដ្ឋអាមេរិក អស់រយៈពេលពីរខែមកហើយ។
ឥឡូវនេះ លោក ចូ បៃដិន បានឈ្នះការបោះឆ្នោតនៅសហរដ្ឋអាមេរិក ហើយតិកតុកចង់ដឹងថា តើគាត់មានវិធីសាស្ត្រអ្វីចំពោះក្រុមហ៊ុនចិន ដែលកំពុងដំណើរការនៅសហរដ្ឋអាមេរិក។ ទោះជាយ៉ាងណា ប្រធានាធិបតីជាប់ឆ្នោតមិនទាន់បានបញ្ជាក់ច្បាស់ ពីគោលជំហររបស់លោក ចំពោះវត្តមានរបស់តិកតុកនៅសហរដ្ឋអាមេរិកនៅឡើយទេ៕