ត្រៀមៗ! ឥទ្ធិពលព្យុះម៉ូឡាវ នឹងបង្កឲ្យប្រទេសកម្ពុជាធ្លាក់ភ្លៀងពីតិចទៅច្រើន ចាប់ពីថ្ងៃទី២៨ តុលា ដល់ថ្ងៃទី០២ វិច្ឆិកា

ភ្នំពេញ៖ យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម នៅព្រឹកថ្ងៃទី២៧ ខែតុលា ឆ្នាំ២០២០ បានឲ្យដឹងថា ឥទ្ធិពលនៃព្យុះទី១៨ ឈ្មោះ ម៉ូឡាវ (MOLAVE) នឹងធ្វើឲ្យប្រទេសកម្ពុជាមានភ្លៀងធ្លាក់ពីកម្រិតតិចទៅច្រើន ចាប់ថ្ងៃទី២៨ ខែតុលា ដល់ថ្ងៃទី០២ ខែវិច្ឆិកា។

យោងតាមការប្រែប្រួលអាកាសធាតុបង្ហាញឲ្យឃើញថា នៅថ្ងៃទី២៦ ខែតុលា ឆ្នាំ២០២០ ព្យុះនេះបានបង្កើនឥទ្ធិពលរបស់ខ្លួន ក្នុងសមុទ្រចិនខាងត្បូង ហើយមានទិសដៅឆ្ពោះទៅប្រទេសវៀតណាម ត្រង់ចំណុចខេត្តក្វាងងៃ (Quang Ngia) រួចថមថយឥទ្ធិពលបន្តបន្ទាប់ឆ្លងកាត់ប្រទេសឡាវ និងប្រទេសថៃ នាថ្ងៃទី២៩ ខែតុលា ឆ្នាំ២០២០។ ជាមួយគ្នានោះ ជ្រលងវិសម្ពាធ និងសម្ពាធទាបម៉ូឡាវ នឹងមានឥទ្ធិពលមកលើប្រទេសកម្ពុជា នៅថ្ងៃទី២៨-២៩ ខែតុលា ឆ្នាំ២០២០។

ស្ថានភាពបែបនេះធ្វើឲ្យ៖

១. បណ្ដាខេត្ដនៅតំបន់វាលទំនាបកណ្ដាល៖ រួមមានបណ្តារាជធានី-ខេត្តមួយចំនួន នៅភាគខាងក្រោម និងជាប់ព្រំដែនវៀតណាម ភ្លៀងនឹងនៅតែបន្តមានក្នុងកម្រិតពីតិចទៅមធ្យមរហូតដល់ថ្ងៃទី០២ ខែវិច្ឆិកា ។ តែសម្រាប់ថ្ងៃទី២៨-២៩ ខែតុលា ពិសេសភាគពាយ័ព្យនឹងមានភ្លៀងធ្លាក់រាយប៉ាយ ក្នុងកម្រិតបរិមាណពីមធ្យមទៅច្រើន។

២. បណ្តាខេត្តជាប់ជួរភ្នំដងរែក និងខ្ពង់រាបឦសាន៖ ភ្លៀងនឹងនៅតែបន្ដមានក្នុងកម្រិតពីតិចទៅបង្គួររហូតដល់ថ្ងៃទី០២ ខែវិច្ឆិកា តែច្រើនលាយឡំនឹងខ្យល់ខ្លាំងនៅថ្ងៃទី២៨-២៩ ខែតុលា។

៣. តំបន់មាត់សមុទ្រ៖ នឹងអាចមានភ្លៀងធ្លាក់រាយប៉ាយ នៅក្នុងកម្រិតបរិមាណ ពីតិចទៅបង្គួរ។

អាស្រ័យដូចបានជម្រាបជូនខាងលើ សូមសាធារណៈជនជ្រាបជាព័ត៌មាន និងបង្កើនការប្រុងប្រយ័ត្ន ដើម្បីចៀសវាងគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕

សូមអានសេចក្ដីជូនដំណឹងលម្អិតរបស់ក្រសួងធនធានទឹក និងឧតុនិយមខាងក្រោមនេះ៖