រកឃើញគំនូរសត្វឆ្មាដ៏ធំមួយ ដែលគូរនៅលើជម្រាលដី មានអាយុកាលពីរពាន់ឆ្នាំ ក្នុងប្រទេសប៉េរូ

បេ៉រូ៖ យោងតាមក្រសួងវប្បធម៌របស់ប្រទេសប៉េរូបានឲ្យដឹងថា គំនូរឆ្មាដ៏ធំមួយត្រូវបានគូរនៅលើជម្រាលដីមួយ ដែលមានអាយុកាល២,០០០ឆ្នាំមកហើយ និងត្រូវបានគេរកឃើញនៅភាគខាងត្បូងប្រទេសប៉េរូ។ គំនូរលើដីពីបុរាណមួយមានទំហំ៣៧ម៉ែត្រ ដែលជាផ្នែកមួយនៃក្រុមគំនូរលើដី Nazca Lines ដែលជាបណ្ដុំនៃស្នាដៃសិល្បៈអាថ៌កំបាំងរាប់រយ ដែលស្ថិតនៅលើខ្ពង់រាបចម្ងាយ៤០២គីឡូម៉ែត្រ ខាងត្បូងរដ្ឋធានី Lima។

ឆ្មានេះបានស្ថិតនៅក្នុងក្រុមគំនូររូបសត្វ ដែលត្រូវបានគេរកឃើញនៅទូទាំងតំបន់ ក្នុងសតវត្សរ៍ចុងក្រោយនេះ រួមមានរូបគំនូរសត្វបក្សី hummingbird សត្វស្វា និងសត្វបក្សី pelican។ របកគំហើញនេះត្រូវបានធ្វើឡើងក្នុងកំឡុងពេលការងារថែទាំ នៅចំណុចគោលដៅទេសចរណ៍មួយ ដែលជាទិសដៅទេសចរណ៍ ដ៏ពេញនិយមរួចទៅហើយ។

សេចក្ដីប្រកាសព័ត៌មានរបស់ក្រសួងបាននិយាយថា រូបដ៏ធំនេះអាចនឹងពិបាកក្នុងការពិនិត្យមើល ដោយសារតែវាជិតនឹងរលុបទៅវិញ ក៏ព្រោះតែវាស្ថិតនៅលើជម្រាលដ៏ចោត និងផលប៉ះពាល់នៃសំណឹកធម្មជាតិ។ បន្ទាប់ពីការអនុវត្តការងារ សម្អាត និងអភិរក្ស អ្នកបុរាណវិទូបានរកឃើញគំនូសខែ្សដែលមានទទឹងពី៣០ទៅ៤០សង់ទីម៉ែត្រ។

រចនាបថនៃការងារសិល្បៈបានបង្ហាញថា វាត្រូវបានបង្កើតឡើងនៅចន្លោះ២០០ ទៅ១០០ឆ្នាំមុនគ្រឹស្តសករាជ នៅចុងសម័យ Paracas។ សេចក្ដីប្រកាសព័ត៌មានបានពន្យល់ថា រូបគំនូរតំណាងសត្វឆ្មានេះអាចត្រូវបានគេឃើញថា ជានិមិត្តរូបលើកុលាភាជន៍និងវាយនភណ្ឌ នៅក្នុងសង្គម Paracas៕