រពឹសពេក យកជែលជម្រុះរោមលាបលើក្បាល ឥឡូវទំពេក ឡើងមុខដូចតួត្លុកក្នុងខ្សែភាពយន្ដ IT

អង់គ្លេស៖ ជឿជាក់ថាប្រិយមិត្តអ្នកអានមួយចំនួន ដែលជាអ្នកគាំទ្រខ្សែភាពយន្ដបរទេស ប្រាកដជាបានទស្សនារួចមកហើយ នូវខ្សែភាពយន្ដបែបភ័យរន្ធត់ចំណងជើងថា IT ដែលមានតួអង្គត្លុកមុខមាត់គួរឲ្យខ្លាច បូករួមទាំងថ្ងាសធំផងដែរ។ ហើយថ្មីៗនេះ មានក្មេងស្រីតូចម្នាក់ វ័យទើបតែ១៨ខែ បានជ្រុះសក់ផ្នែកខាងមុខ ដែលមានមហាជនជាច្រើនបានប្រដូចនាងទៅនឹងតួអង្គត្លុកក្នុងខ្សែភាពយន្ដ IT ផ្ទាល់តែម្ដង។

បើតាមប្រភពព័ត៌មានបានឲ្យដឹងថា ក្មេងស្រីតូចរូបនេះ មានឈ្មោះថា Maisie Saward ហើយកាលពីថ្ងៃសុក្រសប្ដាហ៍មុននេះ នាងបានដើរចូលទៅក្នុងបន្ទប់ទឹកម្នាក់ឯង ខណៈពេលដែលនៅផ្ទះជាមួយឪពុក។ បន្ទាប់មកទៀត នាងបានយកជែលជម្រុះរោម មកលាបលើក្បាល ដោយគិតថាវាជាជែលលាបសក់ឲ្យរឹង ដែលនាងធ្លាប់ឃើញឪពុកលាបពីមុនៗមក។

លុះពេលដែលបុរសជាឪពុកបានឃើញកូនស្រីកំពុងលាបជែលជម្រុះរោម នាងស្រាប់តែញញឹមដាក់លោក ហើយលោកក៏បានប្រញាប់ប្រញាល់លាងសម្អាតជែលចេញពីលើក្បាលរបស់កូនស្រីដែរ ប៉ុន្ដែវាយឺតពេលបាត់ទៅហើយ ដែលសក់ផ្នែកខាងមុខបានជ្រុះដូចទំពេកក្បាលអីចឹង។

យ៉ាងណាមិញ ក្រោយពីរូបភាពប៉ុន្មានសន្លឹករបស់ក្មេងស្រី Maisie ត្រូវបានស្ត្រីជាម្ដាយបង្ហោះទៅលើបណ្ដាញសង្គមរួចមក ទទួលបានចាប់អារម្មណ៍យ៉ាងខ្លាំង និងមានមហាជនជាច្រើន បាននិយាយថា ក្មេងស្រី Maisie ពិតជាដូចនឹងតួអង្គត្លុកក្នុងខ្សែភាពយន្ដ IT ពិតមែន។ ហើយចាប់តាំងពីជ្រុះសក់ខាងមុខមក ក្មេងស្រី Maisie ក៏ត្រូវបានម្ដាយច្នៃម៉ូតសក់ ដោយការគាប់ដង្កៀបបាំងផងដែរ៕

សូមទស្សនារូបភាពខាងក្រោម៖