យល់ដឹង៖ រដូវនេះជារដូវវស្សា មានភ្លៀងធ្លាក់ច្រើន ដែលជាហេតុធ្វើឲ្យ ខេត្តក្រុងមួយចំនួន ត្រូវទទួលរងឥទ្ធិពល នៃគ្រោះទឹកជំនន់ បានទៅបំផ្លិចបំផ្លាញដំណាំ និងលិចផ្ទះប្រជាពលរដ្ឋ ដែលរស់នៅជិតនឹង តំបន់បឹងបួរ និងដងស្ទឹងនានា បន្ទាប់ពីមានការធ្លាក់ភ្លៀង ក្នុងកម្រិតពីមធ្យមទៅច្រើន ក្នុងរយៈពេលប៉ុន្មានថ្ងៃជាប់ៗនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាហេតុដែល ប្រជាពលរដ្ឋខ្មែរទាំងអស់ ត្រូវមានការប្រុងប្រយ័ត្ន នឹងជំងឺម្យ៉ាងដែលមានឈ្មោះថា ទឹកស៊ីជើង។ «ទឹកស៊ីជើង» ឬហៅម្យ៉ាងទៀតថា ការបង្ករោគដោយមេរោគផ្សិត ជាអាការជំងឺសើស្បែក ដែលភាគច្រើនតែងជួបប្រទះ ជាញឹកញាប់នៅពេលមាន បញ្ហាទឹកជំនន់។ អាការៈទឹកស៊ីជើងនេះ អាចបង្កឲ្យយើងមាន ការរមាស់នៅតាម ប្រអប់ជើង តាមចន្លោះម្រាមជើង ក្រចកប្រែជាមានក្លិន ប្រែពណ៌ក្រចក និងស្បែកជើងឡើងរីក ហើយក្រាស់ជាដើម។
មូលហេតុនៃ ការកើតរោគមួយប្រភេទនេះគឺ បណ្តាលមកពីការឆ្លងរោគ និងការមិនមានអនាម័យ ចំពោះស្បែកជើង និងការមិនបានសម្អាត នៅតំបន់ប្រអប់ជើង ឲ្យបានស្អាតល្អ។ ជើងដែលសើមទឹក ឬផ្អាប់ដោយសារជាតិញើស រយៈពេលយូរ បណ្តាលឲ្យស្បែកងាយ ឡើងកន្ទួលក្រហម រហូតដល់ក្លាយទៅជាផ្សិត មានសភាពរមាស់ និងរបកនៅត្រង់បរិវេណ ប្រអប់ជើងនោះផងដែរ។
វីធីការពារជំងឺទឹកស៊ីជើងមានដូចជា៖
១. បន្ទាប់ពីប៉ះជាមួយនឹង ទឹកកខ្វក់ ឬទឹកមានមេរោគហើយ អ្នកត្រូវសម្អាតជើងនឹងសាប៊ូឲ្យបានស្អាត ឬសម្អាតជើង ជាមួយទឹកក្តៅខណ្ហៗក៏បាន រួចជូតឲ្យស្ងួត ដោយកន្សែងពោះគោទន់ៗ។
២. ប្រសិនបើមានរបួស នៅបរិវេណស្បែកបាត់ជើង ឬប្រអប់ជើង អ្នកត្រូវលាងសម្អាតរបួស ដោយទឹកអំបិលនិង ទឹកថ្នាំសម្លាប់មេរោគ។
៣. ហាមប្រើប្រាស់របស់រួម ជាមួយអ្នកដទៃ ដូចជាកន្សែងជូតខ្លួន ស្រោមជើង និងស្បែកជើងជាដើម។
៤. ហាមអេះឬ កេះបរិវេណសាច់ ដែលមានរបួស ព្រោះមេរោគចេញពី របួសអាចធ្វើឲ្យឆ្លង ទៅកាន់ស្បែក នៅបរិវេណដទៃទៀតបាន។
៥. ប្រើប្រាស់ស្រោមជើង និងស្បែកជើងដែលស្ងួត មិនសើមផ្អាប់ជានិច្ច។
ដើម្បីព្យាបាល ជំងឺទឹកស៊ីជើងនេះគឺត្រូវ ប្រើប្រាស់ថ្នាំបំបាត់រមាស់ ឬថ្នាំអាឡែកស៊ី មកលាបពីលើស្បែកប្រអប់ជើង ដើម្បីឲ្យស្បែកមាន សភាពល្អឡើងវិញ មិនមានអាការរមាស់ និងបំបាត់ការប្រះ រលាត់ស្បែកជាដើម។ ករណីដែលស្បែករមាស់ ដល់ថ្នាក់អាប់សែហើយនោះគឺ បណ្តាលមកពីស្បែករហែក ឆ្លងបាក់តេរីរហូត ដល់ថ្នាក់ឡើងផ្សិត។
ដូច្នេះអ្នកគួរតែប្រញាប់ ទៅមន្ទីពេទ្យដើម្បីឲ្យ វេជ្ជបណ្ឌិតធ្វើ ការព្យាបាលបន្ទាន់ ព្រោះអាការបែបនេះ អាចនឹងពិបាកព្យាបាល ហើយចំណាយពេលយូរ និងអស់ថវិកាច្រើនទៀតផង។ ហេតុដូចនេះ ក្នុងអំឡុងពេលដែលទឹក កំពុងតែមានការជន់លិចខ្លាំង សូមប្រជាពលរដ្ឋទាំងអស់ បង្កើននៅការប្រុងប្រយ័ត្នខ្ពស់ ចំពោះបញ្ហាឆ្លងផ្សេងៗ ដែលអាចកើតមានឡើងផងដែរ៕
Bong I.T