អ្នកនាំពាក្យសាលារាជធានីភ្នំពេញ៖ ការសុំបើក​ប្រាក់អត្ថ​ប្រ​យោជន៍​​​នានា​របស់​កម្មករ​ស៊ិន​ទ្រី​មិន​ខុស​ទេ​ តែមិន​ស្រប​តាម​ច្បាប់​ការងារ​

បញ្ហាសំរាមមិនមែនជារឿងថ្មីទេសម្រាប់ក្រុងភ្នំពេញ។ ជិតមួយសប្តាហ៍កន្លងមកនេះ កម្មករប្រមូលសំរាម​របស់​ក្រុមហ៊ុនស៊ិនទ្រីជាង ២០០០នាក់ បានមូលមតិគ្នាធ្វើកូដកម្ម ដោយមិនព្រមចេញប្រមូលសំរាមដូចមុនឡើយ។ ការធ្វើកូដកម្មបែបនេះ ដោយពួកគាត់ទាមទារឲ្យក្រុមហ៊ុនដោះស្រាយជូននូវប្រាក់បំណាច់អតីតភាពកាងារ ​ ប្រាក់ខែ​ចុងក្រោយ ការឈប់សម្រាកប្រចាំឆ្នាំដែលនៅសេសសល់ និងលក្ខខណ្ឌខ្លះៗទៀត។

ស្រមពេលដែលមិនទាន់មានការឯកភាពគ្នារវាងក្រុមហ៊ុន និងកម្មករ មានការត្អូញត្អែរមិនតិចទេពីពលរដ្ឋ និងអ្នកប្រើប្រាស់បណ្តាញសង្គមដែលចេញមុខចែករំលែកនូវយោបល់របស់ខ្លួន។ ក្នុងនោះពួកគេចោទឡើងថា ហេតុអីក្រុមហ៊ុនមិនព្រមដោះស្រាយជូនកម្មករ? ក្លិនសំរាមដែលកកកុញតាមដងផ្លូវ អាចប៉ះពាល់ដល់​សុខភាព​របស់ប្រជាជន​ និងសោភ័ណ្ឌភាពទីក្រុងផង តើរឿងសំរាមនេះ រដ្ឋបាលរាជធានីភ្នំពេញមានចំណាត់ការយ៉ាងណាដែរ?

ជាការឆ្លើយតប លោក ម៉េត មាសភក្តី អ្នកនាំពាក្យសាលារាជធានីភ្នំពេញបានបកស្រាយប្រាប់ Khmerload ថា នៅសុខៗមិនមែនសំរាមចេះតែកកស្ទះទេ។ លោកថា តាំងពីយប់ថ្ងៃសុក្រសប្តាហ៍មុន កម្មករបានធ្វើកូដកម្ម និងមិនព្រមចេញប្រមូលសំរាម។ មន្ត្រីសាលាក្រុងរូបនេះបង្ហើបថា អាជ្ញាធរ និងប្រជាការពារបានចុះអន្តរាគមន៍បឋម ដោយប្រមូលសំរាមជំនួស និងចាត់ទុកថាជាចំណាត់ការ ក៏ដូចជាយន្តការភា្លមៗ ខណៈថ្នាក់លើកំពុងគិតពីដំណោះស្រាយបណ្តើរៗជាមួយកម្មករផង។

លោក មាសភក្តីថា៖ «ករណីសំរាមមិនមែនជារឿងថ្មីទេ ហើយមិនមែននៅសុខៗសំរាមចេះតែកកស្ទះដែរ។ ពួកគាត់ធ្វើកូដកម្ម មិនចេញទៅប្រមូលសំរាម តាំងពីយប់ថ្ងៃសុក្រសប្តាហ៍មុន។ អ៊ឹចឹងមន្ត្រីយើងចុះធ្វើជំនួសភ្លាមៗ ទោះមិនដូចកម្មករ ក៏វាជាដំណោះស្រាយបឋមដែរ។ ពេលប្រជុំថ្ងៃ ០៧តុលា គាត់(កម្មករស៊ិនទ្រី) សន្យាថានឹងឈប់ធ្វើកូដកម្ម ហើយព្រមចេញប្រមូលសំរាម តែក្រោយមកមិនព្រមវិញ។ គាត់ទាមទារលក្ខខណ្ឌ​មួយចំនួន ដែលមិនស្របនឹងច្បាប់ការងារសោះ»។

​លោកថា រដ្ឋបាលរាជធានីកំពុងគិតពីកិច្ចការបម្រុងបន្ទាប់ ដោយសារអាជ្ញាធរអាចគ្រប់គ្រងសំរាមប្រចាំថ្ងៃជាមធ្យមពី ២៥០០ - ៣០០០តោនប៉ុណ្ណោះ តែចំនួនសំរាមដែលកកកុញជិតមួយសប្តាហ៍ស្រាប់ផងនោះ ជាហេតុធ្វើឲ្យបរិមាណ​លើសលប់​ដែលមិនអាចជញ្ជូនចេញទាន់ពេលវេលា។

អ្នកនាំពាក្យសាលារាជធានីភ្នំពេញរូបនេះថា៖ «តាមពិតរឿងនេះជាវិវាទការងាររវាងក្រុមហ៊ុនឯកជនស៊ិនទ្រី និងកម្មករទេ តែអាជ្ញាធរជាម៉ែ ជាឪ ត្រូវតែសម្របសម្រួល។ ហើយហេតុអីបានជាក្រុមហ៊ុនមិនដោះស្រាយជូន? ព្រោះនៅស្រុកខ្មែរយើងត្រូវអនុវត្តតាមច្បាប់ការងារ។ អត្ថប្រយោជន៍ផ្សេងៗដែលពួកគាត់ទាមទារដូចជា​ប្រាក់បំណាច់​អតីតភាពការងារជាដើមនោះ គឺនឹងទទួលបាននៅ​ពេលពួកគាត់ឈប់ពីការងារ មិនមែនពេលនេះទេ»។

លោក ភក្តី បន្ថែមថា៖ «យើងព្យាយាមពន្យល់គាត់ដែរថា ការសុំនេះគឺមិនត្រូវតាមច្បាប់ការងារ។ ការសុំនូវប្រាក់អត្ថប្រយោជន៍របស់ពួកគាត់ពីក្រុមហ៊ុនគឺមិនខុសទេ តែមិនស្របតាមច្បាប់ការងារ។ ការបើកប្រាក់ទាំងនោះលុះត្រាក្រុមហ៊ុនបញ្ឈប់គាត់ ឬគាត់ឈប់ពីការងារ ដែលលក្ខខណ្ឌនោះទើប​តម្រូវឲ្យផ្តល់តាមច្បាប់ការងារ។ ហើយបើសុខៗអត់មានអីផង គាត់មកទាមទារអ៊ឹចឹង វាខុសពីច្បាប់។ យ៉ាងណាយើងនៅតែសម្របសម្រួល ហើយសុំឲ្យគាត់ងាកមកបំពេញតួនាទីដូចដើម។

សូមរំឭកថា តាំងពីល្ងាចថ្ងៃទី ០២តុលាមក កម្មករប្រមូលសំរាមរបស់ក្រុមហ៊ុនស៊ិនទ្រី បាន​ធ្វើ​កូដកម្ម ដោយមិនចេញប្រមូលសំរាម ដែលធ្វើឲ្យមានសំរាមកកស្ទះនៅតាមដងផ្លូវនានា​ក្នុង​រាជធានីភ្នំពេញ។ កម្មករនៅតែមិនព្រមចេញមកបំពេញការងារ បើទោះមានការចុះសម្របសម្រួលដោយផ្ទាល់ពីលោក ឃួង ស្រេង អភិបាលនៃគណៈអភិបាលរាជធានីភ្នំពេញក៏ដោយ។ ក្នុងនោះកម្មករបានទាមទារឲ្យក្រុមហ៊ុន ស៊ិនទ្រី ដោះស្រាយនូវប្រាក់បំណាច់អតីតភាពកាងារ ប្រាក់​សំណង​ជំងឺចិត្ត ប្រាក់ជួសការជូនដំណឹងមុន ​ប្រាក់ខែចុងក្រោយ ការឈប់សម្រាកប្រចាំឆ្នាំដែលនៅសេសសល់។​ ជាការកត់សម្គាល់ មកទល់រសៀលថ្ងៃ ០៩​តុលានេះ មិនទាន់មានការឯកភាពណាមួយនៅឡើយ៕