អាយុគ្រាន់តែជាតួលេខ! លោកយាយវ័យចំណាស់ម្នាក់ ទើបតែរៀនប្រើកុំព្យូទ័រនៅអាយុ៩០ឆ្នាំ

ឥណ្ឌា៖ ស្រី្ដវ័យចំណាស់ម្នាក់ឈ្មោះ Mary Mathews រស់នៅរដ្ឋ Kerala ប្រទេសឥណ្ឌា កំពុងទទួលបានការចាប់អារម្មណ៍ និងការកោតសរសើរយ៉ាងខ្លាំងពីសំណាក់អ្នកប្រើប្រាស់បណ្ដាញសង្គម តាមរយៈរូបភាពប៉ុន្មានសន្លឹកដែលបង្ហាញឲ្យឃើញពីការរៀនប្រើប្រាស់កុំព្យូទ័រយួរដៃរបស់គាត់ នៅអាយុ៩០ឆ្នាំ។

លោកយាយ Mathews កើតនៅទសវត្សរ៍ឆ្នាំ១៩៣០ ដែលសម័យនោះពុំទាន់មានកុំព្យូទ័រប្រើប្រាស់ ហើយព័ត៌មានទាំងឡាយត្រូវបានគេចុះផ្សាយនៅលើកាសែត និងទស្សនាវដ្ដីប៉ុណ្ណោះ។ ប៉ុន្ដែបច្ចុប្បន្ន លោកយាយកំពុងរៀនប្រើកុំព្យូទ័រយួរដៃ ដើម្បីអានកាសែតអេឡិចត្រូនិក ហើយសកម្មភាពគួរឲ្យស្ងើចសរសើរទាំងនោះកំពុងល្បីល្បាញខ្លាំង បន្ទាប់ពីត្រូវបានចែកចាយ ដោយចៅប្រុសរបស់គាត់ឈ្មោះ Arun Thomas ទៅលើវេបសាយ Reddit។

ថ្លែងប្រាប់សារព័ត៌មាន Indian Express លោក Thomas បានឲ្យដឹងថា គ្រួសាររបស់លោកឈប់ទិញកាសែតសន្លឹក ដោយសារភ័យខ្លាចឆ្លងជំងឺកូវីដ-១៩ ហើយជីដូនរបស់លោកបានអានព័ត៌មានតាមអុីនធឺណេតអស់រយៈពេលមួយខែមកហើយ ​និងរៀនប្រើកុំព្យូទ័រយឺតៗ តែចេះបានយ៉ាងច្បាស់៕

សូមទស្សនារូបភាពខាងក្រោម៖