ចិនប្រាប់អាមេរិកឱ្យឈប់បង្កើនចំណងទាក់ទងជាមួយកោះតៃវ៉ាន់

ប៉េកាំង៖ កាលពីថ្ងៃអង្គារម្សិលមិញនេះ ទីក្រុងប៉េកាំងបានស្នើសុំឱ្យសហរដ្ឋអាមេរិកបញ្ឈប់សកម្មភាព​បង្កើនទំនាក់ទំនងការទូតក្រៅផ្លូវការជាមួយកោះតៃវ៉ាន់ បន្ទាប់ពីក្រុងវ៉ាស៊ីនតោនបានប្រកាសអំពីកិច្ចសន្ទនាសេដ្ឋកិច្ចថ្មីជាមួយកោះតៃវ៉ាន់។

លោកស្រី Hua Chunying អ្នកនាំពាក្យក្រសួងការបរទេសចិនបានថ្លែងយ៉ាងដូច្នេះថា៖

កាលពីថ្ងៃច័ន្ទជំនួយការរដ្ឋមន្រ្តីក្រសួងការបរទេសសហរដ្ឋអាមេរិកលោក David Stilwell បាននិយាយថា សហរដ្ឋអាមេរិកនិងកោះតៃវ៉ាន់ នឹងបង្កើតនូវការសន្ទនាសេដ្ឋកិច្ចថ្មីមួយ ដោយផ្តោតលើវិស័យឧបករណ៍អេឡិចត្រូនិក ការថែទាំសុខភាព ថាមពល និងផ្នែកបច្ចេកវិទ្យាផ្សេងៗទៀត។ លោកបានបន្ថែមថា ចំណងទាក់ទងរវាងអាមេរិកនិងកោះតៃវ៉ាន់ គឺនៅតែជាសកម្មភាព​ ដែលស្ថិតក្នុងព្រំដែននៃគោលនយោបាយចិនតែមួយ។ ​ហើយអាមេរិកមិនបានប្រកាន់ជំហរលើការទាមទារអធិបតេយ្យភាពរបស់ក្រុងប៉េកាំងចំពោះកោះតៃវ៉ាន់ឡើយ។

គួរឱ្យដឹងដែរថា ប្រទេសចិន​តែង​ចាត់ទុកកោះតៃវ៉ាន់គឺជា​ខេត្តមួយរបស់ខ្លួន ហើយក៏មិនយល់ព្រមឱ្យកោះតៃវ៉ាន់ ប្រកាសខ្លួនជាកោះឯករាជ្យដែរ។ ចំណែកកោះតៃវ៉ាន់វិញ បានប្រកាសបដិសេធដាច់ខាត ចំពោះការទាមទារអធិបតេយ្យភាព​នេះ ហើយបាននឹងកំពុងបង្កើន​ចំណងមិត្តភាពជាមួយសហរដ្ឋអាមេរិក ​ដោយមានទាំងការស្នើសុំទិញគ្រឿងសព្វាវុធ​ផ្សេងៗ ​ក្នុងគោលបំណងយកមកបង្កើនសមត្ថភាពយោធារបស់ខ្លួន ដើម្បីប្រឆាំងទៅនឹងការដាក់សម្ពាធពីប្រទេសចិន៕