លោក Massimiliano Allegri អតីតគ្រូបង្វឹកក្រុមសេះបង្កង់ Juventus បានចាកចេញពីក្លិបនៅឆ្នាំ ២០១៩ ហើយមកដល់ពេលនេះ លោកមិនទាន់មានក្លិបដឹងនាំនៅឡើយទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សថ្មីៗនេះ កាសែត Marca បានធ្វើបទសម្ភាស និងបានសួរសំនួរជាច្រើនដល់លោកទាក់ទងនឹងគ្រូបង្វឹក និងកីឡាករឆ្នើមៗនៅលីគល្បីៗនៃទ្វីបអឺរ៉ុប។ អ្វីដែលសំខាន់នោះគឺលោកបានកោតសរសើរដល់ Zinedine Zidane ចំពោះទិកនិចដឹកនាំរបស់គាត់ក្នុងកំឡុងពេលដែលគាត់ជាគ្រូបង្វឹកក្រុម Real Madrid ។
ខាងក្រោមនេះជាកម្រងសំនួរដែល Allegri បានឆ្លើយតប៖
១. លោកគ្រូបានចេញពីក្លិប Juventus ក្នុងឆ្នាំ ២០១៩ តើលោកបានធ្វើអ្វីតាំងពីពេលនោះមក?
ចម្លើយ៖ ខ្ញុំបានសិក្សាបន្ថែម និងចំណាយពេលវេលារីករាយជាមួយគ្រួសារនៅទីក្រុង Livorno ។
២. តើលោកអាចនឹងដឹកនាំនៅអុីតាលី ឬនៅក្លិបបរទេសណាមួយក្នុងពេលឆាប់ៗនេះទេ?
ចម្លើយ៖ ខ្ញុំមិនខ្វល់ថាវានៅទីណាទេ។ ខ្ញុំកំពុងស្វែងរកក្លិបមួយដើម្បីចែករំលែកគម្រោងដឹកនាំជាមួយគ្នា និងមានមហិច្ឆិតាប្រកួតប្រជែងដើម្បីឈ្នះជាមួយគ្នា។
៣. តើលោកចង់បង្វឹកនៅ LaLiga Santander ទេ?
ចម្លើយ៖ តើអ្នកណាទៅដែលក្នុងចិត្តនឹងឆ្លើយថាទេចំពោះសំណួរនេះ? គ្មាននោះទេ។
៤. លោកធ្លាប់ឈ្នះជើងឯក Serie A ចំនួន ៥ ដងជាមួយ Juventus តើលោកគិតថាពួកគេនឹងឈ្នះពាននេះលើកទី ៩ នៅរដូវកាលនេះដែរឬទេ?
ចម្លើយ៖ រចនាសម្ព័ននៅក្លិបនេះគឺត្រូវបានបង្កើតឡើងដើម្បីឈ្នះ និងឈ្នះ។ នោះហើយជាមូលហេតុដែលខ្ញុំគិតថាពួកគេនឹងបន្តឈ្នះជាច្រើនឆ្នាំ។
៥. តើលោកគិតថា AC Milan អាចឈ្នះពានរង្វាន់នេះម្តងទៀត ឬយ៉ាងណា?
ចម្លើយ៖ ជាអកុសល ខ្ញុំគិតថាពួកគេនៅតែខ្វះខាតបន្តិច។ AC Milan ត្រូវមានផែនការរឹងមាំ និងស្ថិតស្ថេរ។ ការផ្លាស់ប្តូរក្រុមរៀងរាល់រដូវកាលមិនធ្វើឱ្យក្រុមរីកចម្រើននោះទេ។
៦. តើលោកគិតថា Lautaro Martinez មានអ្វីពិសេសសម្រាប់ Barcelona ដែរឬទេ?
ចម្លើយ៖ ការពាក់អាវរបស់ក្រុមបាសេឡូណាពិតជាមានទំនួលខុសត្រូវខ្ពស់ណាស់ ហើយកីឡាករណាក៏ដោយត្រូវតែមានកម្លាំង និងបុគ្គលិកលក្ខណៈល្អដើម្បីមានសមត្ថភាពពាក់អាវក្រុមមួយនេះ។ Lautaro មានគុណសម្បត្តិពេញលេញអាចទទួលបានភាពជោគជ័យ។ គាត់ធ្វើបានយ៉ាងល្អនៅក្រុម Inter នៅពេលនេះ ប៉ុន្តែយើងនឹងដឹងថាតើគាត់អាចបង្ហាញខ្លួននៅ Camp Nou ថ្ងៃណាមួយបាន ទេ។
៧. តើអ្នកគិតថាអ្វីជាភាពខុសគ្នាធំបំផុតរវាង LaLiga Santander និង Serie A?
ចម្លើយ៖ វាហាក់មានសេចក្តីរីករាយជាងក្នុងការលេងនៅ La Liga ទោះបីជាលទ្ធផលបែបណាក៏ ដោយ។ បន្ទាប់ពីរកគ្រាប់បាល់បានក្រុមនៅតែបន្តលេងដូចជាមិនមានអ្វីកើតឡើង។ ម្យ៉ាងវិញទៀតនៅប្រទេសអុីតាលី ក្រុមពោរពេញដោយសេចក្តីស្រឡាញ់ និងការយកចិត្តទុកដាក់ក្នុងការលេង។ អ្វីដែលក្រុមផ្តោតនោះគឺការយកឈ្នះ។
៨. តើអ្នកគិតថាវាពិបាកក្នុងការលេងបាល់ទាត់អុីតាលីមែនទេ?
ចម្លើយ៖ ត្រូវហើយ! ដូចអ្វីដែលខ្ញុំបាននិយាយពីមុនអ៊ីចឹង។ នៅទីនេះកីឡាករមិនមានសេរីភាពទេ ហើយវាធ្វើឱ្យមានការលំបាកពេលចូលលេង។
៩. ហេតុអ្វីបានជា Juventus ហាក់មិនសូវលេចធ្លោខ្លាំងក្នុងការប្រកួតពានអឺរ៉ុប? ពួកគេមិនបានឈ្នះពានរង្វាន់ Champions League ចាប់តាំងពីឆ្នាំ ១៩៩៦ មកម្ល៉េះ។
ចម្លើយ៖ ខ្ញុំមិនយល់ស្របនឹងរឿងនោះទេ។ ក្នុងរយៈពេលប៉ុន្មានឆ្នាំចុងក្រោយនេះ ពួកគេធ្វើបានយ៉ាងល្អដោយបានឈានដល់វគ្គផ្តាច់ព្រ័ត្រចំនួន ២ ដង (ឆ្នាំ ២០១៥ និង ២០១៧) និងបានទំលាក់ក្រុមខ្លាំងមួយចំនួនថែមទៀតផង។
១០. តើអ្នកគិតថា Cristiano Ronaldo នឹងលេងឱ្យ Juventus បានយូរឆ្នាំទៀតទេ?
ចម្លើយ៖ បាទពិតណាស់។
១១. តើអ្នកគិតថា Juventus រីកចម្រើនខ្លាំងពេលមាន Cristiano Ronaldo ដែរឬទេ?
ចម្លើយ៖ បាទពិតណាស់! គ្មានអ្វីត្រូវសង្ស័យនោះទេ។
១២. តើគ្រូបង្វឹកជនជាតិអេស្ប៉ាញមួយណាដែលលោកកោតសរសើរខ្លាំង?
ចម្លើយ៖ ជាក់ស្តែងគឺលោក Pep [Guardiola] និង Luis Enrique ។
១៣. តើអ្នកចូលចិត្តចំណុចណាពី Zinedine Zidane?
ចម្លើយ៖ ភាពខ្លាំងដែលគាត់មានគឺការស្វែងរកតុល្យភាពដែលមិនអាចខ្វះបានរបស់ក្រុម ដែលពោរពេញទៅដោយការប្រឹងប្រែងហ្វឹកហាត់ និងទេពកោសល្យខ្ពស់។ សម្រាប់ខ្ញុំ ការដាក់ខ្សែបម្រើ Casemiro គឺបង្ហាញពីចំណុចល្អបំផុតរបស់ Zizou ។
១៤. តើអ្នកចូលចិត្តចំណុចណាខ្លះពី Diego Simeone?
ចម្លើយ៖ គឺសមត្ថភាពពិសេសរបស់គាត់ក្នុងការបង្កើតការយល់ចិត្តជាមួយក្រុមរបស់គាត់។ Diego និងកូនក្រុមរបស់គាត់គឺជាដៃគូដែលមិនមានក្រុមណាដូច។ ខ្ញុំមិនដឹងថាមានគ្រូបង្វឹកណាផ្សេងដែលមានសមត្ថភាពដូចអ្វីដែលស្រដៀងនឹង Diego ទេ។
១៥. លោកធ្លាប់មានទំនាក់ទំនងជាមួយ Real Madrid ប៉ុន្មានដងហើយ? តើលោកមានឱកាសចូលរួមទេ?
ចម្លើយ៖ កាលពី ២ ឆ្នាំមុនធ្លាប់មានទំនាក់ទំនង ប៉ុន្តែគ្មានអ្វីកើតឡើងដោយសារខ្ញុំនៅជាប់កុងត្រាជាមួយ Juventus ទៅហើយ។ លើសពីនេះទៅទៀត ពេលនោះខ្ញុំមានការប្តេជ្ញាចិត្តលើសីលធម៌យ៉ាងមុតមាំចំពោះក្លិប និងអ្នកគាំទ្រផងដែរ៕
ប្រភព៖ Marca