អាមេរិក៖ រដ្ឋបាលចំណីអាហារនិងឪសថអាមេរិក (FDA) បានដកការប្រើប្រាស់ថ្នាំប្រឆាំងនឹងជំងឺគ្រុនចាញ់ hydroxychloroquine ដែលប្រើក្នុងករណីព្យាបាលបន្ទាន់។ FDA បាននិយាយថា ភស្ដុតាងថ្មីពីការសាកល្បងបានបង្ហាញថា វាលែងមានហេតុផល ក្នុងការជឿថា ថ្នាំនេះអាចនឹងមានលទ្ធភាព ប្រឆាំងនឹងវីរុស។

កាលពីខែមីនា រដ្ឋបាលចំណីអាហារនិងឪសថអាមេរិកបានអនុញ្ញាត ឲ្យប្រើប្រាស់ថ្នាំនេះ ក្នុងករណីព្យាបាលជាបន្ទាន់ សម្រាប់ករណីធ្ងន់ធ្ងរមួយចំនួន។ ប៉ុន្តែកាលពីថ្ងៃចន្ទ ទីភ្នាក់ងារនេះបាននិយាយថា ការសិក្សាផ្នែកវេជ្ជសាស្ត្របានបង្ហាញថា ថ្នាំ hydroxychloroquine មិនមានប្រសិទ្ធភាព ក្នុងការព្យាបាលវីរុសដ៏កាចសាហាវនេះ ហើយក៏មិនអាចការពារនៃការឆ្លង ក្នុងចំណោមអ្នកដែលមានផ្ទុកជំងឺកូវីដ-១៩។

ឆ្លើយតបទៅនឹងសេចក្ដីសម្រេចរបស់រដ្ឋបាលចំណីអាហារនិងឪសថអាមេរិក លោក ត្រាំ បាននិយាយថា គាត់ធ្លាប់ប្រើថ្នាំបង្ការនេះ ដោយគ្មានផលប៉ះពាល់អ្វីទាំងអស់។ ប្រធានាធិបតីវ័យ៧៤ឆ្នាំរូបនេះបាននិយាយថា មនុស្សជាច្រើនបានប្រាប់គាត់ថា វាបានជួយសង្គ្រោះជីវិតរបស់ពួកគេ។ នៅក្នុងខែឧសភា លោក ត្រាំ បានបង្ហាញថា គាត់កំពុងប្រើថ្នាំនេះ បន្ទាប់ពីមានមនុស្សមួយចំនួននៅក្នុងសេតវិមាន បានធ្វើតេស្ដរកឃើញវីរុសកូរ៉ូណា។

ការសាកល្បងនៅជុំវិញពិភពលោក ត្រូវបានបង្អាក់ជាបណ្ដោះអាសន្ន នៅពេលដែលការស្រាវជ្រាវមួយ ដែលចេញផ្សាយនៅក្នុងទិនានុប្បវតិ្ត The Lancet បានអះអាងថា ថ្នាំនេះបានបង្កើនការស្លាប់ និងបញ្ហាបេះដូងចំពោះអ្នកជំងឺមួយចំនួន។ លទ្ធផលនេះបានជំរុញឲ្យអង្គការសុខភាពពិភពលោក បញ្ឈប់ការសាកល្បង ដោយសារតែបញ្ហាសុវត្ថិភាព៕