ភ្នំពេញ៖ ក្បាច់ពិជ័យសង្គ្រាម ឬយុទ្ធក្រមខម គឺជាក្បាច់គុនបុរាណខ្មែរមួយ ក្នុងចំណោមក្បាច់គុនខ្មែរដទៃផ្សេងទៀត ដែលមានអាយុកាល ដ៏យូរលង់ណាស់មកហើយ ហើយក៏ជាក្បាច់គុន ដែលមានវ័យចំណាស់មួយ នៅក្នុងតំបន់ និង ពិភពលោកផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោក ច័ន្ទ សុវណ្ណរតន: ដែលជាអនុប្រធាន នៃសហព័ន្ធយុទ្ធក្រមខមកម្ពុជា បានឲ្យដឹងថា សហព័ន្ធយុទ្ធក្រមខម ត្រូវបានបង្កើតឡើងដំបូង កាលពីឆ្នាំ២០១១ ហើយក្បាច់គុនយុទ្ធក្រមខមនេះ ក៏ជាក្បាច់គុនមួយដែលត្រូវបាន យកទៅបង្កើតជា ក្បាច់គុនកងយុទ្ធពលខេមរភូមិន្ទ ដែលបានយកទៅបង្ហាត់ដល់ កងទ័ព ទាហាន និងពលទាហានខ្មែរ នៅទូទាំងប្រទេស ដូចជាប៉ូលីស ប៉េអឹម ជាដើម។
គួរបញ្ជាក់ឲ្យដឹងផងដែរថា ក្បាច់គុនយុទ្ធក្រមខម ត្រូវបានបង្កើតឡើង ក្នុងរជ្ជកាលព្រះបាទជ័យវរ្ម័នទី៧ ព្រះអង្គបានប្រមូលផ្តុំ ក្បួនខ្នាត៣សម័យកាលបញ្ចូលគ្នាគឺ សម័យកាលនគរភ្នំ សម័យនរគចេនឡា និងសម័យមហាអាណាចក្រអង្គរ ទ្រង់ប្រសិទ្ធនាមថា មហាមឆវៈគុនមហាយុទ្ធក្រមខម ឬក្បួនពិជ័យសង្រ្គាមខ្មែរមហានគរ។ យុទ្ធក្រមខមនេះ គឺ ជាអាវុធដ៏សម្បើមសម្រាប់ ការពារជាតិទឹកដីនគរ និងសាសនាពីពួកបច្ចាមិត្ត ដែលចូលមកឈ្លានពាន ទឹកដីរបស់យើង។
យុវជន ផិន ច័ន្ទសុភក្រ័ ជាសិស្សម្នាក់កំពុងហាត់រៀន ក្បាច់គុនយុទ្ធក្រមខមបានឲ្យដឹងថាខ្លួនបាន ចូលហាត់រៀនក្បាច់គុននេះ អស់រយៈពេលជាង២ឆ្នាំមកហើយ។ ហើយមូលហេតុដែលចូលហាត់រៀន ក្បាច់គុនបុរាណខ្មែរមួយនេះ ក៏ដោយសារតែចង់អភិរក្ស ក៏ដូចជាមានចិត្តស្រលាញ់ នៅក្បាច់គុនបុរាណខ្មែរ និងដើម្បីពង្រឹងដល់សុខភាពផងដែរ។ យុវជនរូបនេះ ក៏បានបន្តទៀតផងដែរថា នៅអំឡុងពេលដែលហាត់ដំបូងៗ ពិតជាមានការឈឺចាប់ ខ្លួនប្រាណបន្តិចមែន តែនៅពេលដែលយើងហាត់យូរៗទៅ គឺធ្វើឲ្យយើងសុំា ថែមទាំងអាចជួយដល់រាងកាយ និងសុខភាពឲ្យល្អ មាំមួនទៀតផង ។
រីឯកុមារី សុខ ដារ៉ាម៉ាដាលីស និងឃុន សម្បត្តិដាវីយ៉ា ក៏បានឲ្យដឹងផងដែរថា ប្អូនស្រីចូលហាត់ក្បាច់គុននេះ ក៏ព្រោះតែទឹកចិត្តស្រលាញ់ និងចង់អភិរក្ស ក្បាច់គុនបុរាណរបស់ខ្មែរ។ ចំណែកអ្នកផ្ទះក៏មិនមានការជំទាស់ ឬមានការរារាំងអ្វីនោះឡើយ តែគាត់ថែមទាំងជម្រុញ និងលើកទឹកចិត្តបន្ថែមទៀត។ ជាមួយគ្នានេះដែរ ប្អូនស្រីទាំងពីរក៏សូមអំពាវនាវឲ្យយុវតីខ្មែរ ចូលមកហាត់ក្បាច់គុននេះ ឲ្យបានកាន់តែច្រើនបន្ថែមទៀត ព្រោះអាច ចំណេញបានទាំងសុខភាព រួមទាំងបានចេះក្បាច់គុន ទុកសម្រាប់ការពារខ្លួនផងដែរ។
យ៉ាងណាមិញ សម្រាប់សិស្សានុសិស្ស ដែលមានចំណាប់អារម្មណ៍ ចង់ចូលមកហាត់រៀនក្បាច់គុននេះ គឺមិនកំណត់ប្រុសស្រីនោះទេ តែសិស្សទាំងអស់ត្រូវមាន អាយុចាប់ពី៩ឆ្នាំឡើង មានរាងកាយមាំមួន ល្មមអាចហាត់ពត់ខ្លួន អាចគ្រប់គ្រងខ្លួនឯងបាន ទើបអាចចូលហាត់រៀន ក្បាច់គុននេះបាន។
លោក វិន សុភត្រា (នរ:សខ្លា) ដែលជាគ្រូបង្វឹកមួយរូប ប្រចាំសហព័ន្ធយុទ្ធក្រមខមកម្ពុជា លោកបានចូលហាត់រៀន ក្បាច់គុនយុទ្ធក្រមខមនេះ អស់រយៈពេល១១ឆ្នាំ ហើយនៅក្នុងឆ្នាំ២០១២ លោកក៏បានក្លាយទៅជា គូ្របង្ហាត់បន្តមួយរូប។ លោកបានឲ្យដឹងថា ជាទូទៅ ការហ្វឹកហាត់របស់ ក្បាច់គុនយុទ្ធក្រមខមនេះ ដំបូងឡើយគឺត្រូវមាន ការហាត់នៅចលនាបឋម (ហាត់ចលនាចន្លាក់ដៃ ជើងក) ដើម្បីបង្កាកុំឲ្យមាន ការថ្លោះ គ្រេច អំឡុងពេលហ្វឹកហាត់ពេលឈរ អង្គុយ វាយជាដើម។ បន្ទាប់មកទើបឈានដល់ ការហ្វឹកហាត់ជំហរ គឺមានជំហរសម្រាប់រង និងជំហរសម្រាប់វាយ តបតទៅវិញ និងក្បាច់បន្តទៀត មានដូចជាក្បាច់ដៃ កែង ជង្គង់ និងក្បាច់ជើងជាដើម។
ជាចុងក្រោយ លោក វិន សុភត្រា (នរ:សខ្លា) ក៏មានជាសារចូលរួមផ្តាំផ្ញើ ក្នុងនាមជាគ្រូក្បាច់គុនមួយរូប និងជាប្រជាពលរដ្ឋខ្មែរ លោកសប្បាយចិត្តនៅពេលដែល បានឃើញកូនខ្មែរមិនថា ប្រុសឬស្រីបានចូលរួមមកហាត់ ក្បាច់គុនយុទ្ធក្រមខមនេះ ហើយលោកក៏សំណូមពរឲ្យ នៅតែបន្តតទៅទៀត ព្រោះនេះជាក្បាច់គុនរបស់យើង និងជាក្បាច់គុនរបស់ប្រទេស។
ស្របពេលដែល លោកច័ន្ទ សុវណ្ណរតន: ដែលជាអនុប្រធាននៃ សហព័ន្ធយុទ្ធក្រមខមកម្ពុជា ក៏សំណូមពរឲ្យប្រជាពលរដ្ឋខ្មែរ ទាំងអស់មិនថាប្រុសឬស្រី សូមជួយចូលរួមអភិរក្ស នៅក្បាច់គុនបុរាណខ្មែរ ដែលជាសម្បត្តិវប្បធម៌ខ្មែរ ហើយចូលរួមផ្សព្វផ្សាយសម្បត្តិវប្បធម៌ខ្មែរ ទៅឲ្យបរទេសបានយល់ បានស្គាល់បានដឹង ក្នុងនាមជាកុលបុត្រខ្មែរ ជំនាន់ក្រោយទាំងអស់គ្នាផងដែរ៕
Bong I.T