ក្ដៅៗ! ជនជាតិថៃប្រមាណ ១១០ នាក់បានត្រឡប់មកពីទីក្រុងតូក្យូ ក្នុងនោះមាន ៧ នាក់មានអាការក្តៅខ្លួន

ថៃ៖ ជនជាតិថៃសរុបចំនួន ១១០ នាក់ដែលជាប់នៅក្នុងប្រទេសជប៉ុនដោយសារជំងឺរាតត្បាត COVID-១៩ បានវិលត្រឡប់ទៅផ្ទះវិញនៅថ្ងៃអង្គារនេះតាមជើងហោះហើរពីទីក្រុងតូក្យូ។

ពួកគេត្រូវបានទទួលដោយក្រុមមន្រ្តីមកពីការិយាល័យលេខាធិការអចិន្រ្តៃយ៍ទទួលបន្ទុកផ្នែកការពារ និងគ្រប់គ្រងជំងឺឆ្លងបន្ទាប់ពីការហោះហើរនៃជើងយន្តហោះ NH847 របស់ក្រុមហ៊ុន Nippon Airways បានចុះចតនៅអាកាសយានដ្ឋានសុវណ្ណភូមិនៅម៉ោង ២ និង ៥១ នាទីរសៀល។

នៅក្នុងដំណើរការស្តង់ដារពិនិត្យសុខភាពពួកគេ ៧ នាក់ត្រូវបានរកឃើញថាមានគ្រុនក្តៅ ហើយត្រូវបានបញ្ជូនទៅមន្ទីរពេទ្យដើម្បីធ្វើការពិនិត្យបន្ថែម។ ចំណែកអ្នកនៅសេសសល់ ត្រូវបានដឹកតាមរថយន្តក្រុងទៅកាន់ Pattaya និង Chon Buri នៅ Bay Beach Hotel ដែលជាកន្លែងពួកគេត្រូវស្នាក់នៅក្នុងអំឡុងពេលនៃការដាក់ឲ្យនៅដាច់ដោយឡែករយៈពេល ១៤ ថ្ងៃ៕

ប្រភព៖ Bangkok Post