សម័យកូរ៉ូណា! សប្បករម្នាក់ យកស្បែកពស់ថ្លាន់ធ្វើជាម៉ាស់ លក់ក្នុងតម្លៃរាប់សិបដុល្លារ

អាមេរិក៖ សប្បករម្នាក់ឈ្មោះថា ប៊្រេន វូដ វ័យ៦៣ឆ្នាំ មកពីរដ្ឋផ្លរីដា បានផលិតម៉ាស់ធ្វើពីស្បែកពស់ថ្លាន់ ក្នុងគោលបំណងចំនួនពីរ គឺពាក់ការពារជំងឺកូវីដ-១៩ និងកម្ចាត់ពស់ថ្លាន់ រួមទាំងសត្វបង្គួយដែលបំផ្លាញប្រព័ន្ធអេកូឡូសុីរបស់រដ្ឋ។

លោក ប៊្រេន វូដ គឺជាម្ចាស់ហាង All America Gator Products ហើយគាត់បានមានគំនិតធ្វើម៉ាស់ស្បែកពស់ថ្លាន់នេះឡើង ដោយសារតែគាត់បានឃើញរូបភាពសេះមួយក្បាល ពាក់អាវទ្រនាប់របស់មនុស្សស្រីធ្វើជារបាំងមុខ។ បន្ទាប់មកគាត់ក៏បានខ្ចីអាវទ្រនាប់ភរិយារបស់គាត់ដើម្បីធ្វើតេស្ដសាកល្បង មើលថា តើគំនិតនេះអាចដំណើរការ ឬយ៉ាងណា។

ទន្ទឹមនឹងនេះដែរ មានអ្នកប្រមាញ់ម្នាក់ឈ្មោះថា អាមមី សៀរ បានទៅដល់ផ្ទះរបស់គាត់ ដោយនាំយកពស់ថ្លាន់ដ៏ធំមួយក្បាល។ ហើយពស់ថ្លាន់នោះ មានប្រវែងប្រមាណពី ៥.៥ម៉ែត្រ ទៅ៦ម៉ែត្រ ដែលសុីសត្វកណ្ដុរ និងក្ដាន់ជាអាហារ។

យ៉ាងណាមិញ ជាលទ្ធផលឥឡូវនេះ គាត់បានជោគជ័យក្នុងការផលិតម៉ាស់ពីស្បែកពស់ថ្លាន់នោះ និងដាក់លក់ក្នុងតម្លៃ ៩០ដុល្លារអាមេរិក នៅលើគេហទំព័រហ្វេសប៊ុករបស់គាត់ផ្ទាល់៕

សូមទស្សនារូបភាពខាងក្រោម៖