ដល់ក! មេចុងភៅម្នាក់ ស្ដោះទឹកមាត់ដាក់អាហារ ពេលកំពុងចម្អិន (មានវីដេអូ)

ចិន៖ រឿងរ៉ាវនឹកស្មានមិនដល់មួយ បានកើតឡើងនៅវេលាម៉ោងប្រហែល២:០០រសៀលថ្ងៃអាទិត្យកន្លងទៅថ្មីៗនេះ ដោយអតិថិជនម្នាក់ បានផ្ទុះកំហឹងជាខ្លាំង នៅពេលបានឃើញមេចុងភៅក្នុងភោជនីយដ្ឋានស៊ូហ៊្វូជី ក្នុងទីក្រុងស៊ីអាន បានស្ដោះទឹកមាត់ដាក់លើម្ហូប ខណៈពេលកំពុងចម្អិន។

អតិថិជនខាងលើមានឈ្មោះថា លោក Zheng បានឲ្យដឹងថា ដំបូងឡើយលោកបានកុម៉្មង់សម្លឲ្យកូនរបស់លោក តែដោយសាររសជាតិមិនសូវឆ្ងាញ់ លោកបានបញ្ជូនសម្លនោះទៅចុងភៅវិញ ដើម្បីទទួលបានសម្លថ្មី។ តែអ្វីដែលលោកនឹកស្មានមិនដល់ គឺលោកបានឃើញកន្ទុយបារីនៅក្នុងចានសម្លថ្មីនោះ ប៉ុន្ដែអ្នករត់តុបានប្រាប់លោកថា កន្ទុយបារីនោះបានធ្លាក់ចូលដោយចៃដន្យប៉ុណ្ណោះ។

ពេលឮដូច្នេះ លោក Zheng មិនអស់ចិត្ដឡើយ ដោយលោកបានស្នើសុំឆែកវីដេអូក្នុងកាមេរ៉ាសុវត្ថិភាពភ្លាមៗតែម្ដង។ លោក Zheng ពិតជាភ្ញាក់ផ្អើលយ៉ាងខ្លាំង នៅពេលបានឃើញមេចុងភៅនោះ ធ្វើការចម្អិនដោយមិនពាក់ម៉ាស់ការពារ ហើយថែមទាំងស្ដោះទឹកមាត់ដាក់លើម្ហូបរបស់លោកទៀតផង។

ជុំវិញករណីនេះ ខាងភោជនីយដ្ឋានបានអះអាងថា មេចុងភៅនោះមានឈ្មោះថា Wang អាយុ ២២ឆ្នាំ ហើយពេលនោះលោក Wang​ មិនបានស្ដោះទឹកមាត់ដាក់ម្ហូបទេ គឺលោកស្ដោះលើឥដ្ឋការ៉ូតែប៉ុណ្ណោះ។ ជាមួយគ្នានេះ មេចុងភៅបានសារភាពថា លោកមានជំងឺរលាកបំពង់ក ហើយនៅពេលកំពុងចម្អិន លោកស្រាប់តែមានអាការឈឺភ្លាមៗ ទើបលោកស្ដោះបែបនេះ។

យ៉ាងណាមិញ យោងតាមសារព័ត៌មានប៉េកាំងបានរាយការណ៍ថា ក្រុមអាជ្ញាធរកំពុងបើកការស៊ើបអង្កេតលើបញ្ហានេះ និងបញ្ជាឲ្យខាងភោជនីយដ្ឋាន ដោះស្រាយបញ្ហារបស់ខ្លួន។ ហើយបើតាមសេចក្ដីរាយការណ៍ដដែលនេះ ក្រុមមន្ដ្រីរំពឹងថា ភោជនីយដ្ឋានខាងលើនឹងត្រូវដកហូតអាជ្ញាប័ណ្ណអាជីវកម្ម ហើយថែមទាំងផាកពិន័យជាសាច់ប្រាក់ចំនួន ១០០,០០០ យ័ន (ប្រមាណ ១៤,០០០ដុល្លារអាមេរិក) ទៀតផង៕

សូមទស្សនាវីដេអូខាងក្រោម៖