ប្លែកភ្នែក! ហ្វេសប៊ុកកំពុងធ្វើតេស្ត មុខងារប្ដូរពណ៌ Profile នៅលើទូរសព្ទ

បរទេស៖ ហ្វេសប៊ុកកំពុងព្យាយាមរកវិធី ធ្វើឲ្យកម្មវិធីនៅលើទូរសព្ទ Android កាន់តែមានសម្រស់ឆើតឆាយ ជាមួយមុខងារថ្មីមួយ។ វិស្វករខាងផ្នែក software នាង Jane Manchun Wong ទើបតែរកឃើញមុខងារមួយនេះ កាលពីប៉ុន្មានសប្ដាហ៍មុន នៅពេលវាស្ថិតក្នុងដំណាក់កាលមិនទាន់ប្រសើរនៅឡើយ។

កាលពីដំបូង មុខងារនេះផ្លាស់ប្ដូរពណ៌ផ្ទៃខាងក្រោយ ដោយសារការចាប់យកពណ៌ចេញពីរូបភាព profile របស់អ្នកប្រើប្រាស់ ដើម្បីឲ្យផ្ទៃ profile និងរូបថតរបស់យើងស៊ីគ្នា។

កាលពីពេលថ្មីៗនេះ Jane ទើបតែបង្ហាញការផ្លាស់ប្ដូរថ្មីនៃមុខងារមួយនេះ ដែលវាធ្វើឲ្យមានភាពកាន់តែប្រសើរជាងមុន។ ដោយជំនួសឲ្យការចាប់ពណ៌ចេញពីរូបភាព profile មុខងារមួយនេះបានចាប់ផ្ដើមប្រែពណ៌ផ្ទៃ profile ទាំងមូលទៅតាមរូបភាព cover ជំនួសវិញ ពីព្រោះលទ្ធផលកាលពីមុន ហាក់ដូចជាមិនសូវបានល្អ។

ខណៈមុខងារនេះស្ថិតនៅក្នុងដំណាក់កាលសាកល្បង ហើយមានតែអ្នកជំនាញប៉ុណ្ណោះ ដែលអាចស្វែងរកមុខងារបង្កប់មួយនេះ។ គេសង្ឃឹមថា មុខងារប្រែពណ៌ profile មួយនេះនឹងចាប់ផ្ដើមធ្លាក់ទៅដល់ដៃអ្នកប្រើប្រាស់ទូទៅ នៅប៉ុន្មានសប្ដាហ៍ទៀត។

ហ្វេសប៊ុកក៏ប្រហែលនឹងធ្វើឲ្យមុខងារមួយនេះ មានភាពប្រសើរឡើង មុនពេលឲ្យសាធារណជនបានប្រើប្រាស់។ ពួកយើងនឹងរង់ចាំមើលទាំងអស់គ្នាថា មុខងារមួយបានជួយបង្កើនសោភ័ណភាព profile របស់យើងបានដល់កម្រិតណា៕