អុញ! ជាងកាត់សក់នៅចិន រុំស្កុតជុំវិញម៉ាស៊ីនឈូសសក់ជាប់នឹងចុងឈើ ដើម្បីរក្សាគម្លាតឲ្យឆ្ងាយពីអតិថិជន ខណៈវីរុសកូវីដ-១៩កំពុងរាតត្បាត (មានវីដេអូ)

ចិន៖ ជាងកាត់សក់ក្នុងប្រទេសចិន បានចាប់ផ្ដើមបញ្ចេញនូវគំនិតច្នៃប្រឌិតថ្មីមួយ ដោយរុំស្កុតជុំវិញម៉ាស៊ីនឈូសសក់ជាប់នឹងចុងឈើ ដើម្បីរក្សាគម្លាតឲ្យឆ្ងាយពីអតិថិជន ខណៈវីរុសកូវីដ-១៩កំពុងរាតត្បាត។ 

យោងតាមវីដេអូឃ្លីបបង្ហាញឲ្យឃើញថា ជាងកាត់សក់នៅហាងមួយកន្លែង បានពាក់ម៉ាស់ការពារ និងកាន់ឈើវែងដែលមានប្រវែងប្រមាណ១,២០ម៉ែត្រ ដោយមានរុំស្ដុតជុំវិញម៉ាស៊ីនឈូសសក់ ម៉ាស៊ីនផ្លុំសក់ ក្រាស់ និងច្រាស់សម្រាប់កក់សក់ជាដើម។

លោក Wu Junlong ជាម្ចាស់ហាងកាត់សក់នៅក្នុងខេត្ត Henan បានឲ្យដឹងថា ការប្រើវិធីកាត់សក់បែបនេះជូនអតិថិជន គឺមានភាពពិបាកខ្លាំងមែនទែន តែដើម្បីសុវត្ថិភាពគឺត្រូវតែទ្រាំ។

ទន្ទឹមនឹងនេះដែរ ក៏មាន ជាងកាត់សក់ម្នាក់ទៀតឈ្មោះថា He Bing មកពីខេត្ត Sichuan បានបង្ហោះវីដេអូឃ្លីបខ្លីមួយទៅលើបណ្ដាញសង្គម ដែលបង្ហាញពីវីធីនៃការកាត់សក់ដូចនឹងហាងខាងលើដែរ ដោយទទួលបានការចាប់អារម្មណ៍យ៉ាងច្រើនផងដែរ។

គួរឲ្យដឹងដែរថា មន្ត្រីសុខាភិបាលចិនបានណែនាំឲ្យប្រជាពលរដ្ឋរបស់ខ្លួនរក្សាចម្ងាយ អប្បបរមា១,៥ម៉ែត្រ ពីម្នាក់ទៅម្នាក់នៅតាមទីសាធារណៈ៕

សូមទស្សនារូបភាពនិងវីដេអូខាងក្រោម៖