ទឹកចិត្តគ្រូបង្រៀន ខំលីទូរទឹកកក ដើរកាត់ព្រៃ៨ម៉ោង ដើម្បីយកទៅឲ្យសិស្សនៅឯតំបន់ដាច់ស្រយាល (មានវីដេអូ)

ម៉ាឡេស៊ី៖ លោក Harry Yanto Bikal ជាគ្រូបង្រៀននៅតំបន់ SK Longkogungan Penampang រដ្ឋ Sabah បានលីទូរទឹកកកដែលមានទម្ងន់៤០គីឡូក្រាម ដើរឆ្លងកាត់ក្នុងព្រៃចំនួន១០គីឡូម៉ែត្រ ដោយចំណាយអស់រយៈ៨ម៉ោង ដើម្បីយកទៅឲ្យសិស្សដែលស្នាក់នៅអគារស្នាក់ដាច់ស្រយាលមួយ។ សិស្សថ្នាក់បឋមសរុបទាំងអស់មានចំនួន១១នាក់ ដោយសិស្ស៩នាក់ស្នាក់នៅក្នុងអគារស្នាក់ ដោយសារតែផ្ទះរបស់ពួកគេនៅឆ្ងាយពីសាលារៀន។

យ៉ាងណាមិញ ដោយសារតែការដើរជាមធ្យោបាយតែមួយប៉ុណ្ណោះទៅដល់ទីនោះ លោកគ្រូ Harry បានសម្រេចចិត្តលីទូរទឹកកកផ្ទាល់តែម្ដង។ ក្នុងការធ្វើដំណើរនេះដែរ គាត់ត្រូវឆ្លងកាត់ស្ពាន ទឹកហូរ និងផ្លូវដ៏សែនពិបាកផងដែរ។ ហើយវាក៏មិនមែនជាបញ្ហាសម្រាប់គាត់ឡើយ ព្រោះគាត់តែងតែទិញម្ហូបអាហារ យកទៅឲ្យសិស្សនៅថ្ងៃចុងសប្ដាហ៍ជានិច្ច។

វីដេអូឃ្លីបខ្លីមួយដែលបង្ហាញពីសកម្មភាពលោកគ្រូ Harry លីទូរទឹកក ត្រូវបានយកទៅបង្ហោះនៅលើបណ្ដាញសង្គមហ្វេសប៊ុក ដោយទទួលបានការកោតសរសើរជាខ្លាំងពីសំណាក់មហាជន។ ទន្ទឹមនឹងនេះដែរ លោកគ្រូ Harry បានថ្លែងអំណរគុណទៅដល់រដ្ឋ Sabah និងអង្គការក្រៅរដ្ឋាភិបាល NGOs ដែលបានជួយផ្គត់ផ្គង់កន្លងមក ហើយគាត់ក៏សង្ឃឹមថា នៅថ្ងៃមុខនឹងមានផ្លូវសម្រាប់ឲ្យរថយន្ដធ្វើដំណើរទៅកាន់ទីនោះផងដែរ៕

សូមទស្សនារូបភាពនិងវីដេអូខាងក្រោម៖