ឆ្លៀតពេកហើយ! នារីម្នាក់ អានសៀវភៅបណ្ដើរ និងបើកបរបណ្ដើរក្នុងពេលតែមួយ (មានវីដេអូ)

អង់គ្លេស៖ ថ្មីៗនេះ នារីម្នាក់ (មិនស្គាល់អត្តសញ្ញាណ) បានអានសៀវភៅ ខណៈពេលកំពុងបើកបរ នៅលើផ្លូវសាធារណៈក្នុងទីក្រុង Derby ប្រទេសអង់គ្លេស។

យោងតាមវីដេអូដែលថតឡើងដោយលោក Lou Smith ជាអ្នកដំណើរលើផ្លូវរួមគ្នា បានបង្ហាញឲ្យឃើញថា នារីរូបនោះ បានបើកបររថយន្ដប្រភេទ Audi A5 ពណ៌ទឹកប្រាក់ ក្នុងល្បឿនយ៉ាងលឿន ដោយប្រើដៃខាងឆ្វេងប៉ុណ្ណោះកាន់ចង្អូត ចំណែកឯដៃស្ដាំវិញកាន់សៀវភៅ ហើយភ្នែកសម្លឹងមើល។

យ៉ាងណាមិញ ក្រោយពីវីដេអូខាងលើនេះ បង្ហោះទៅលើបណ្ដាញសង្គមរួមក អាជ្ញាធរបានស្នើសុំឲ្យអ្នកដំណើរទាំងអស់ ប្រសិនបើឃើញអ្នកបើកបរណាម្នាក់ ធ្វើសកម្មភាពប្រថុយនឹងគ្រោះថ្នាក់បែបនេះទៀត គួរតែថតស្លាកលេខរថយន្ដ និងវីដេអូទុក ដើម្បីឲ្យប៉ូលិសងាយស្រួលក្នុងការស្វែងរក និងកោះហៅមកព្រមាន៕

សូមទស្សនារូបភាពនិងវីដេអូខាងក្រោម៖