Bayern Munich បន្តភាពមិនដែលចាញ់ក្នុងពូល B ខណៈពេលដែល Toni Kroos ស៊ុត១គ្រាប់យក៣ពិន្ទុ ជួយ Real Madrid បន្តក្ដីសង្ឃឹមទៅមុខទៀត (មានវីដេអូ)

ក្រិក៖ ក្រុម Olympiacos ក្នុងនាមជាម្ចាស់ផ្ទះបានបើកទ្វារកីឡដ្ឋាន Karaiskaki Stadium ទទួលស្វាគមន៍ក្រុមភ្ញៀវ FC Bayern Munich ក្នុងក្របខណ្ឌ Champions League កាលពីរាត្រីថ្ងៃអង្គារកន្លងទៅនេះ។

ក្រុមទាំងពីរមានឱកាសសម្រុកគ្នាទៅវិញទៅមកដោយក្រុមម្ចាស់ផ្ទះស៊ុតបាន១០ជើងចំគោលដៅ៤ដង សម្រេចទីបាន២គ្រាប់ ចំណែកឯក្រុមភ្ញៀវស៊ុតបាន១៣ជើងចំគោលដៅ៧ដង ទម្លុះសំណាញ់ទីបាន៣គ្រាប់។

២គ្រាប់របស់ក្រុមម្ចាស់ផ្ទះធ្វើបានដោយកីឡាករ Youssef El Arabi និង កីឡាករ ​Guilherme ចំណែកឯ៣គ្រាប់របស់ក្រុមភ្ញៀវរកបានដោយកីឡាករ២រូបផ្សេងគ្នាដោយគ្រាប់ទី១ និងទី២ធ្វើបានតាមរយៈខ្សែប្រយុទ្ធ Robert Lewandowski និង គ្រាប់ទី៣ទម្លុះសំណាញ់ទីដោយកីឡាករ Corentin Tolisso។

ដូច្នេះប្រកួតចប់៩០នាទីក្រុមម្ចាស់ផ្ទះ Olympiacos រងបរាជ័យក្រោមថ្វីជើងក្រុមភ្ញៀវ FC Bayern Munich ក្នុងលទ្ធផល ២ទល់នឹង៣។ តាមរយៈលទ្ធផលនេះធ្វើអោយក្រុម Olympiacos មិនទាន់ស្វែងរកជ័យជម្នះរបស់ខ្លួនឃើញនៅឡើយទេដោយពួកគេមានតែ១ពិន្ទុប៉ុណ្ណោះក្នុងចំណោម៣ប្រកួតកន្លងទៅនេះឈរបាតតារាងក្នុងពូល B។

ក្រឡេកទៅមើល១គូទៀតក្នុងពូល A ដែលជាការប្រកួតរវាងក្រុម Galatasaray ទល់នឹងក្រុមអធិរាជស Real Madrid ។

ក្រុមភ្ញៀវ Real Madrid មានឱកាសសម្រុកច្រើនទៅលើក្រុមម្ចាស់ផ្ទះដោយស៊ុតបាន២៤ជើងចំគោលដៅ១៤ដង សម្រេចទីបាន១គ្រាប់ចំណែកឯក្រុមម្ចាស់ផ្ទះវិញមានឱកាសស៊ុតបាន៧ជើងចំគោលដៅ៣ដង ប៉ុន្តែមិនអាចទម្លុះសំណាញ់ទីក្រុមភ្ញៀវបាននោះទេ។

១គ្រាប់របស់ក្រុមភ្ញៀវធ្វើបានដោយខ្សែបម្រើសញ្ជាតិអាល្លឺម៉ង់កីឡាករ Toni Kroos ដែលជាការបញ្ជូនបាល់បានយ៉ាងល្អពីសំណាក់កីឡាករ Eden Hazard នៅនាទី១៨។

ក្រោយបញ្ចប់ការប្រកួតក្រុម​ភ្ញៀវ Real Madrid ទទួលជ័យជម្នះទៅលើក្រុមម្ចាស់ផ្ទះក្នុងលទ្ធផល ០ ទល់នឹង ១។ តាមរយៈលទ្ធផលនេះជួយអោយ Real Madrid ទទួលបាន៣ពិន្ទុបន្ថែមឡើងមកឈរលេខ២ក្នុងពូល A មាន៤ពិន្ទុក្នុងដៃដេញពីក្រោយក្រុមកំពូលតារាង PSG ចំនួន៥ពិន្ទុ៕

បើចង់ឃើញការស៊ុតបញ្ចូលទីគ្នា អស្ចារ្យយ៉ាងណានោះសូមទស្សនាវីដេអូខាងក្រោម៖