Barcelona ចង់ឆ្មក់យកខ្សែបម្រើរូបនេះពី Man Utd ដោយគ្មានតម្លៃខ្លួនបន្ទាប់ពីរូបគេមិនទាន់ចុះកុងត្រាថ្មីជាមួយក្លិប

អេស្ប៉ាញ៖ ក្លិប Barcelona ត្រូវបានគេរាយការណ៍ថាកំពុងត្រៀមឆ្មក់យកកីឡាករ Angel Gomes ដោយគ្មានតម្លៃខ្លួនពីក្លិប Manchester United បន្ទាប់ពីខ្សែបម្រើសញ្ជាតិអង់គ្លេសវ័យក្មេងរូបនេះមិនទាន់បានចុះកុងត្រាថ្មីជាមួយក្លិប។

កីឡាករ Angel Gomes មិនសូវមានឱកាសបានបង្ហាញខ្លួនជាជម្រើស​១១នាក់ដំបូងច្រើននោះទេក្រោមការដឹកនាំរបស់លោក Ole ក្នុងរដូវកាលនេះ។

យោងតាមគេហទំព័រ Talksport បានបញ្ជាក់ថាកុងត្រារបស់កីឡាករ Angel Gomes នឹងផុតកំណត់នៅពេលបញ្ចប់រដូវកាលនេះ។ ដូច្នេះមានន័យថាក្លិប Barcelona ឬក្លិបផ្សេងៗទៀតដែលចាប់អារម្មណ៍ទៅលើកីឡករ Angel Gomes អាចធ្វើការចរចាចុះកុងត្រាទុកមុន (Pre Contract) ជាមួយខ្សែបម្រើវ័យក្មេងរូបនេះបាននៅខែមករាខាងមុខ។

យោងតាមប្រភពដដែលបានអោយដឹងថាក្លិប ​Manchester United កំពុងព្យាយាមពិភាក្សាជាមួយនឹងតំណាងរបស់កីឡាករ Angel Gomes ជុំវិញការចុះកុងត្រាថ្មីជាមួយក្លិប ស្របពេលដែលកីឡាកររូបនេះត្រូវបានចាប់អារម្មណ៍ពីសំណាក់ក្លិប Barcelona ដោយក្លិបមានការព្រួយបារម្ភខ្លាចបាត់បង់កីឡាករវ័យក្មេងរូបនេះដោយគ្មានតម្លៃខ្លួន៕

ប្រភព៖ Caughtoffside