អតីតមេដឹកនាំក្រុងហុងកុង ប្រកាសផ្តល់ប្រាក់រង្វាន់ជិត ១៣ម៉ឺនដុល្លារ ដើម្បីស្វែងរកបាតុករម្នាក់ ដែលបានយកទង់ជាតិចិនបោះចូលសមុទ្រ (មានវីដេអូ)

ហុងកុង៖ ផ្ទុះការភ្ញាក់ផ្អើលពេញបណ្តាញសង្គមហ្វេសប៊ុក ក្រោយអតីតមេដឹកនាំក្រុងហុងកុងលោក Leung Chun-ying បានប្រកាសផ្តល់ប្រាក់រង្វាន់ជិត ១៣ម៉ឺនដុល្លារ ដើម្បីស្វែងរកនិងតាមចាប់បាតុករម្នាក់ដែនបានយកទង់ជាតិចិនបោះចូលសមុទ្រ។

យោងតាមប្រភពបានឱ្យដឹងថា កាលពីពេលថ្មីៗនេះ មានបាតុករអនាមិកម្នាក់ ​បានដកទង់ជាតិចិនចោលនៅតំបន់កំពង់ផែ Victoria រួចក៏បោះវាចោលក្នុងសមុទ្រ ក្នុងគោលបំណងចង់ឱ្យហុងកុងរស់នៅដោយឯករាជ្យដោយខ្លួនឯង មិនចង់ជាប់ជំពាក់ជាមួយចិននោះទេ។

ក្រោយមកមិនយូរប៉ុន្មាន អតីតមេដឹកនាំក្រុងហុងកុងលោក Leung Chun-ying ក៏បានប្រកាសលើគណនីហ្វេសប៊ុកផ្លូវការថា នឹងផ្តល់ប្រាក់រង្វាន់លើកទឹកចិត្ត ១លានដុល្លារហុងកុង ឬស្មើនឹង ១២៧,០០០ដុល្លារអាមេរិក ដល់ជនណាម្នាក់ដែលបានដឹងព័ត៌មានទាក់ទិនទៅនឹងបាតុករម្នាក់នេះ ដើម្បីតាមចាប់រូបគេយកមកផ្តន្ទាទោសតាមផ្លូវច្បាប់។

យោងតាមច្បាប់ហុងកុងបានចែងថា ការប្រមាថមើលងាយ ឬជេរប្រមាថទង់ជាតិ ឬនិមិត្តរូបប្រទេសចិនគឺជាបទល្មើសព្រហ្មទណ្ឌ ដែលនឹងត្រូវផ្តន្ទាទោសដាក់ពន្ធនាគាររហូតដល់ ៣ឆ្នាំ។

បច្ចុប្បន្នរឿងរ៉ាវមួយនេះបាននិងកំពុងតែល្បីនៅទីក្រុងហុងកុងហើយក៏មានអ្នកប្រើប្រាស់បណ្តាញសង្គមមួយចំនួន សម្តែងការគាំទ្រលោក Leung Chun-ying ខណៈពេលអ្នកខ្លះក៏មិនពេញចិត្តដូចគ្នាផងដែរ៕

ចង់ជ្រាបច្បាស់ទស្សនាវីដេអូខាងក្រោម៖