តារាកម្សាន្ត៖ ដូចពាក្យមួយឃ្លាលើកឡើងថា ជួបជានិស្ស័យ ព្រាត់ជាកម្មពៀរ តារាប្រុសស្រីល្បីៗប្រចាំវិស័យសិល្ប:កម្ពុជាពីរដួង គឺលោក ម៉ាច័ន្ទបញ្ញា តារាចម្រៀងប្រុសសម្លេងពិរោះ បានប្រកាសចែកផ្លូវជាមួយនិងកញ្ញា អុឹងអុឹង តារាសម្តែងដ៏ល្បី ព្រមទាំងកាលពីពេលថ្មីៗកន្លងទៅនេះ លោកហេងពិទូ ម្ចាស់បទរឿងអតីត បានប្រកាសចែកផ្លូវជាមួយនឹងកញ្ញាហ្វីយ៉ាតា ដែលបានបង្កជាការភ្ញាក់ផ្អើលជាខ្លាំងដល់មហាជន និងអ្នកគាំទ្រនៅក្នុងបណ្តាញសង្គម ដែលមូលហេតុបណ្តាលឲ្យបែកគ្នានេះ គឺសុទ្ធសឺងតែមកពីបញ្ហារកាំរកូសក្នុងចំណងស្នេហ៍ដែលមិនអាចទទួលយកបាន។
ជាក់ស្តែង កាលពីកំឡុងខែមេសា ឆ្នាំ២០១៩ កញ្ញា អុឹងអុឹង តារាសម្តែងដ៏ល្បីបានប្រកាសចែកផ្លូវគ្នាជាមួយនឹងតារាចម្រៀងប្រុស លោកម៉ាច័ន្ទបញ្ញា ក្រោយមានមតិមហាជនមួយចំនួនបានលើកឡើងថា បណ្តាលមកពីលោកច័ន្ទបញ្ញា ប្រចណ្ឌកញ្ញាអុឺងអុឹងក្នុងកំឡុងពេលថតរឿងភាគមួយ ហើយចំណងស្នេហ៍របស់អ្នកទាំងពីរដែលខំសាងឡើងអស់ពេលជាង៥ឆ្នាំក៏ត្រូវបានបញ្ចប់។
យ៉ាងណាមិញ ងាកក្រលេកមកមើល ការប្រកាសផ្តាច់ចំណងស្នេហ៍រវាងកញ្ញា ហ្វីយ៉ាតា និងលោកហេងពិទូ ឯណេះវិញ ក៏មិនខុសគ្នាពីគូមុនប៉ុន្មានដែរ ដោយយោងតាមសំណេរបង្ហោះនៅលើគណនីហ្វេសប៊ុកផ្ទាល់ខ្លួន ដោយលោកហេងពិទូ បានសារភាពថា កំហុសទាំងអស់គឺមកពីខ្ញុំ ខ្ញុំលួចទាក់ទងមនុស្សស្រីផ្សេង គ្មានគុណធម៍ ហេីយសូមទោសសំរាប់កំហុសដរធ្ងន់មួយនេះហេីយក៏សូមទោសហ្វីយ៉ាតា នៅកំហុសមួយនេះ នឹងអរគុណសំរាប់ការលេីកលែង៕