កុំឲ្យស្ងាត់! នី​ រតនា ដឹកដៃគ្រួសារធ្វើដំណើរកម្សាន្តលើទឹកដីមណ្ឌលគិរី ក្តីសុខឡើងពេញទំហឹង

មណ្ឌលគិរី៖  បន្ទាប់ពីម្ចាស់ពានរង្វាន់ Cambodian Idol លោក នី រតនា ប្រឡូកក្នុងវិស័យសិល្បៈអស់រយៈពេលប៉ុន្មានឆ្នាំនេះមកឃើញថា សន្ទុះទីផ្សារនៃការគាំទ្រ និងប្រជាប្រិយភាពរបស់លោកកាន់តែឡើងខ្ពស់ពីមួយថ្ងៃទៅមួយថ្ងៃគួរឲ្យកត់សម្គាល់តែម្តង ទោះបីជាលោករៀបការ និងមានគ្រួសារក្តី ក៏លោកនៅតែទទួលបានការស្រលាញ់ ចូលចិត្តពីសំណាក់មិត្តអ្នកគាំទ្រគ្រប់ទិសទីផងដែរ។  

យ៉ាងណាមិញ គិតមកទល់ពេលនេះលោក នី រតនា បានដឹកដៃភរិយាជាទីស្រលាញ់ចូលរោងការ និងសាងគ្រួសារតូចមួយរយៈពេល ២ ឆ្នាំមកហើយ។ ហើយជារឿយៗលោក និងភរិយាបានបង្ហោះរូបភាពស្វីតៗនៅលើបណ្តាញសង្គម Facebook និង Instagram ធ្វើឲ្យអ្នកគាំទ្រជាច្រើនច្រណែន លាន់មាត់សរសើរសឹងគ្រប់ៗគ្នាពីក្តីសុខ និងសុភមង្គលរបស់ក្រុមគ្រួសារលោក នី រតនា។  

ជាក់ស្តែង ថ្មីៗនេះលោកក៏បានដឹកដៃគ្រួសារទៅធ្វើដំណើរកម្សាន្តផងដែរ ។ ពោល នៅក្នុងដំណើរកម្សាន្តសម្រាកលំហែកាយលើកនេះ ដោយតារាចម្រៀងប្រុសខាងលើ ក៏បានថតរូប ជាមួយភរិយារួមទាំងកូនស្រីដ៏គួរឲ្យស្រលាញ់ជាច្រើនសន្លឹក ជាមួយនឹងទេសភាពវាលស្មៅធម្មជាតិស្រស់បំព្រងនៅលើទឹកដីសមុទ្រឈើខេត្តមណ្ឌលគិរី យ៉ាងស្រស់ស្អាត អមជាមួយនឹងសកម្មភាព បង្អួតភាពផ្អែមល្ហែមជាមួយគ្នា ធ្វើឱ្យអ្នកនៅលីវជាច្រើន ឃើញហើយអាចលើសជាតិស្ករបាន។

លើសពីនេះ តាមរយៈរូបភាពទាំងនោះ មានហ្វេនៗ និងមហាជន ចូលបញ្ចេញមតិជាហូរហែរ និងមានកូនចិត្តលួចច្រណែន ពីគ្រួសារអ្នកទាំងពីរ ដែលកាន់តែស្រលាញ់គ្នា​ មិនចាញ់កាលស្រលាញ់គ្នាពីលើកដំបូងឡើយ ទោះបីជាពេលនេះមានកូនរួចមកហើយក្តី៕

សូមទស្សនារូបភាពខាងក្រោម៖