អាងហែលទឹកដ៏ខ្ពស់បំផុតនៅលើពិភពលោក បានបើកដំណើរការនៅទីក្រុងឌូបៃ

ឌូបៃ៖ អ្វីក៏អាចទៅរួចដែរនៅទីក្រុងឌូបៃ ឥឡូវនេះអាងហែលទឹកដែលមានកម្ពស់ប្រហែល300ម៉ែត្រពីនីវ៉ូទឹកសមុទ្រ ចាប់បើកទទួលភ្ញៀវទេសចរហើយ។

ជាប់ឈ្មោះក្នុងខែមីនាថាជាអាងហែលទឹកបែប infinity pool ដែលខ្ពស់ជាងគេបំផុតនៅលើពិភពលោក អាងនៅលើដំបូលសណ្ឋាគារ Address Beach Resort ដែលទើបនឹងបើកថ្មី មានកម្ពស់ដល់ទៅ293.906ម៉ែត្រ។

អាងហែលទឹកនេះក៏មិនមែនតូចដែរ វាមានបណ្តោយ94.84ម៉ែត្រនិងទទឹង16.5ម៉ែត្រ វាមានប្រវែងជិតពីរដងនៃអាងហែលទឹកនៅកីឡាអូឡាំពិក។

អាងហែលទឹកនេះគឺបើកសម្រាប់តែភ្ញៀវរបស់សណ្ឋាគារ ដែលមានអាយុចាប់ពី21ឆ្នាំឡើងទៅប៉ុណ្ណោះ។ ភ្ញៀវក៏អាចទទួលទានអាហារនៅខាងលើសណ្ឋាគារផងដែរ ដោយនៅជាប់នឹងអាងហែលទឹកនេះគឺមានភោជនីយដ្ឋានអាស៊ីមួយ ដែលមានឈ្មោះថា Zeta Seventy Seven ដែលវាក៏ស្ថិតនៅជាន់ទី77របស់សណ្ឋាគារជាមួយអាងហែលទឹកដូចគ្នា៕

Join us: https://t.me/khmerload