ឥណ្ឌា៖ ខណៈពេលដែលប្រទេសឥណ្ឌាកំពុងជួបបញ្ហានៃសន្ទុះនៃការកើនឡើងនៃការឆ្លងវីរុសកូវីដ១៩ យ៉ាងគំហក ការប្រមូលផ្តុំគ្នាដែលមានការកកកុញណែនណាន់តាន់តាប់ ដែលពុំបានគោរពនូវវិធានការគម្លាតសង្គម បានកើតឡើងនៅថ្ងៃអង្គារនេះ នៅក្រុង Sanand រដ្ឋ Gujarat ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមប្រភពព័ត៍មានបានឱ្យដឹងថា ស្ត្រីឥណ្ឌារាប់ពាន់នាក់ បានជួបជុំប្រមូលផ្តុំគ្នា ដើម្បីថ្វាយទឹក នៅវិហារ Baliyadev។ ការប្រមូលផ្តុំមនុស្សច្រើនកកកុញបែបនេះ បានកើតឡើងបន្ទាប់ពីគ្រូអាចារ្យមា្នក់បានអះអាងថា ជំងឺកូវីដ១៩ កើតមានឡើង ដោយសារតែ ព្រះខឹង។ ក្រោយពីមានការអះអាង និងអំពាវនាវពីលោកគ្រូអាចារ្យម្នាក់ មនុស្សជាច្រើនកោះករ នាំគ្នាធ្វើពិធីដើម្បីកម្ចាត់ជំងឺកូវីដ១៩។
ក្រោយពីវីដេអូនៃការប្រមូលផ្តុំគ្នានេះ ត្រូវបានចែកចាយពេញបណ្តាញសង្គម ប៉ូលីសឥណ្ឌាបានធ្វើការចាត់វិធានការភ្លាមៗចំពោះអ្នកដែលទទួលខុសត្រូវ។
យោងតាមប្រភពពីប៉ូលីសបានឱ្យដឹងថា ប៉ូលីសបានទៅភូមិ Navapura ភ្លាមៗ ដើម្បីស្រាវជ្រាវបញ្ហានេះ ពេលទៅដល់ ប៉ូលីសបានប្រទះឃើញ ស្ត្រីបានប្រមូលផ្តុំគ្នាក្បែរព្រះវិហារ Baliyadev។
ទោះយ៉ាងណា ពេលនេះប៉ូលីសបានចាត់វិធានការលើមនុស្សចំនួន ២៣ នាក់នៅក្នុងភូមិ Navapura និង មេភូមិនេះ ហើយប៉ូលីសក៏បានចាត់វិធានការលើ អ្នកដែលកំពុងលេងភ្លេងក៏ដូចជាអ្នករៀបចំកម្មវិធីប្រមូលផ្ដុំខាងសាសនានេះផងដែរ។