អាមេរិកនឹងអនុញ្ញាតិឱ្យជនភៀសខ្លួនជាង ៦ម៉ឺននាក់ចូលទឹកដីខ្លួន ក្រោយទទួលការរិះគន់លើគោលនយោបាយអន្តោប្រវេសន៍

អាមេរិក៖ កាលពីថ្ងៃចន្ទកន្លងទៅ ប្រធានាធិបតីទី៤៦របស់សហរដ្ឋអាមេរិក លោក ចូ បៃដិន បានប្រកាស ថាលោកនឹងអនុញ្ញាតឱ្យជនអន្តោប្រវេសន៍៦ម៉ឺន ២ពាន់ ៥រយនាក់ ចូលមកក្នុងសហរដ្ឋអាមេរិកក្នុងឆ្នាំ២០២១នេះ។ ការប្រកាសនេះធ្វើឡើងក្រោយលោកទទួលរងនូវការរិះគន់ទាក់ទិននឹងគោលនយោបាយអន្តោប្រវេសន៍។

លោក ចូ បៃដិន បានបញ្ជាក់ថា រដ្ឋបាលមុនទទួលស្វាគមន៍ជនអន្តោប្រវេសន៍ត្រឹម១ម៉ឺន៥ពាន់នាក់ប៉ុណ្ណោះដែលនេះមិនបានឆ្លុះបញ្ចំាងពីតម្លៃរបស់សហរដ្ឋអាមេរិក ក្នុងនាមជាប្រជាជាតិមួយដែលស្វាគមន៍ និងគាំទ្រជនអន្តោប្រវេសន៍នោះឡើយ។ លោកបន្ថែមថា ការអនុញ្ញាតចំនួន៦ម៉ឺន២ពាន់៥រយនាក់នេះ គឺជាការលុបចោលប្រវត្តិសាស្ត្រនៃការទទួលយកជនអន្តោប្រវេសន៍ក្នុងចំនួនដ៏ទាបដែលបន្សល់ទុកដោយរដ្ឋបាលមុន។

ទន្ទឹមនឹងនេះ សេតវិមានក៏រំពឹងដែរថា ការសម្រេចចិត្តនេះនឹងបន្សាបការរិះគន់នៅក្នុងចំណោមសមាជិកសភាមកពីគណបក្សប្រជាធិបតេយ្យ ហើយអាចរក្សាឯកភាពក្នុងបក្ស៕