អេស្ប៉ាញ៖ លោក John Bico ដែលជាអតីតភ្នាក់ងាររបស់ ខ្សែប្រយុទ្ធ Eden Hazard ជឿជាក់ថាបើសិនកាលណោះ Hazard ចាកចេញពី Chelsea មកចូលរួមជាមួយក្លិបអ្នកមានបុណ្យ Barcelona គឺគេប្រហែលក្លាយជាកីឡាករឆ្នើមផ្ដាច់គេក្នុងលោក។
Bico គិតថា ការផ្ទេររបស់ Hazard ទៅ Real Madrid នេះវាមិនមែនជាគំនិតល្អនោះឡើយព្រោះអ្នកគាំទ្រទាំងអស់សង្ឃឹមខ្ពស់ថារូបគេអាចនឹងមកជំនួស ខ្សែប្រយុទ្ធ Cristiano Ronaldo ដែលចាកចេញពីក្លិបនៅឆ្នាំ ២០១៨។
លោក John Bico បានថ្លែងថា៖
វាជាកំហុសមួយរបស់គេដែលផ្ទេរទៅ Real Madrid នៅពេលនោះ ខ្ញុំដឹងថាវាជាអ្វីដែលបេះដូងគេចង់បានប៉ុន្តែអ្នកក៏ត្រូវរិះគិតពីហេតុផលឲ្យច្បាស់លាស់ដែរ។ គេគួរតែចាកចេញទៅ Real Madrid មុននោះមួយឆ្នាំ ព្រោះពេលដែលគេផ្ទេរទៅគឺនៅឆ្នាំ ២០១៩ ។ ខ្ញុំគិតថាការដែលគេខំព្យាយាមបំពេញចន្លោះរបស់ Ronaldo វាពិតជាដូចកំពុងឡើងភ្នំហិមាល័យទាំងដែលគ្មានអ្វីក្នុងដៃសោះ។ បើសិនជាខ្ញុំនៅធ្វើការឲ្យគេ ខ្ញុំនឹងប្រាប់គេឲ្យទៅ Real Madrid មុននោះមួយឆ្នាំ។
ដោយឡែក លោក Bico ក៏គិតដែរថានៅ Real Madrid គឺក្លិបទាមទារឲ្យកីឡាករមានកាយសម្បទារឹងមាំនិងតម្រូវឲ្យមានការហ្វឹកហាត់ខ្លាំងជាងនៅក្លិបផ្សេងៗទើបលោកគិតថា Barcelona ជាជម្រើសដ៏ត្រឹមត្រូវសម្រាប់កីឡាករសញ្ជាតិប៊ែលហ្ស៊ិករូបនេះ។
មនុស្សទាំងអស់មិនបានជាគិតទេថាក្លិប Real Madrid ជាក្លិបធំណាស់ដូច្នេះក្លិបទាមទារឲ្យកីឡាករហ្វឹកហាត់យ៉ាងសកម្ម អ្នកមើលចុះកីឡាករមានទេពកោសល្យដូច James Rodriguez មិនអាចសម្របខ្លួននឹងលក្ខខណ្ឌនៃការហ្វឹកហាត់បានឡើយ ខ្ញុំគិតថា Eden មិនគួរជាកីឡាកររបស់ Real Madrid ទេតែជាកីឡាកររបស់ Barcelona ។ Barcelona ជាក្លិបដែលគេគួរតែផ្ទេរទៅ កន្លែងនោះគឺបាល់ពិតជារត់លឿនជាងកីឡាករទៅទៀត។ នៅ Barcelona គេអាចនឹងមានសេរីភាពលើទីលានច្រើន និងអាចរក្សាបាល់នៅជាប់ជើងបាន ហើយគេប្រហែលក្លាយជាកីឡាករល្អផ្ដាច់គេក្នុងលោក។
គួររម្លឹកផងដែរថា ខ្សែប្រយុទ្ធ Eden Hazard ផ្ទេរពី Chelsea ទៅ Real Madrid ក្នុងឆ្នាំ២០១៩ ដោយតម្លៃខ្លួនដល់ទៅ ១៥០លានផោន(ស្មើនឹង២០៨.៦លានដុល្លារ) ប៉ុន្តែពេលផ្ទេរមកទឹកដី Santiago Bernabeu គឺទម្រង់លេងរបស់គេធ្លាក់ចុះខ្លាំងណាស់និងមានបញ្ហារបួសមិនចេះចប់មិនចេះហើយ៕
ប្រភព៖ marca
ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖
https://t.me/khmerload
Bong I.T