គូស្នេហ៍មួយគូ ស្រលាញ់តុក្កតាដូរ៉េម៉នតាំងពីខ្លួននៅក្មេង លុះដល់ថ្ងៃភ្ជាប់ពាក្យ តុបតែងឡើងពេញរោង

វៀតណាម៖ គូស្នេហ៍មួយគូ នៅឯប្រទេសវៀតណាម បានធ្វើឲ្យមហាជនអ្នកប្រើប្រាស់បណ្ដាញសង្គមមានការចាប់អារម្មណ៍យ៉ាងឆាប់រហ័សកាលពីប៉ុន្មានសប្ដាហ៍កន្លងទៅថ្មីៗនេះ បន្ទាប់ពីរូបភាពចំនួនប៉ុន្មានសន្លឹក ដែលបង្ហាញពីទិដ្ឋភាពនៃពិធីភ្ជាប់ពាក្យរបស់ពួកគេ ត្រូវបានថត និងយកទៅបង្ហោះចែកចាយ។

តាមប្រភពព័ត៌មានបានឲ្យដឹងថា នាង Khanh Lam អាយុ២៨ឆ្នាំ និងលោក Xuan Khanh អាយុ២៩ឆ្នាំ គឺជាអ្នកគាំទ្រដ៏ងប់ងល់តាំងពីវ័យក្មេង របស់តុក្កតាដូរ៉េម៉ន (Doraemon) ហើយមុនពេលពិធីភ្ជាប់ពាក្យរៀបចំឡើង ពួកគេក៏មានគំនិតតុបតែងរោងដោយមានតុក្កតាដូរ៉េម៉នតែម្ដង។ ដំបូងឡើយពួកគេ គិតថាឪពុកម្ដាយទាំងសងខាង នឹងជំទាស់ ប៉ុន្ដែផ្ទុយទៅវិញ មិនមានការជំទាស់អ្វីទេ និងថែមទាំងមានការជំរុញបន្ថែមផងដែរ។ បន្ទាប់មក ពួកគេបានចំណាយពេលជាង៦ខែ ក្នុងការស្វែងរកគ្រឿងតុបតែងនានា រហូតដល់សម្រេចក្ដីស្រមៃ ដែលពិធីភ្ជាប់ពាក្យប្រព្រឹត្តទៅយ៉ាងរលូនកាលពីខែមុន។

ទន្ទឹមនឹងនេះ នាង Khanh Lam បានរៀបរាប់ដែរថា រូបនាងផ្ទាល់ពិតជាស្រលាញ់តុក្កតាដូរ៉េម៉នយ៉ាងខ្លាំង ដែលធ្វើឲ្យឪពុកម្ដាយ និងមិត្តភក្ដិ តែងតែទិញវត្ថុអនុស្សារីយ៍ទាក់ទងនឹងតុក្កតាដូរ៉េម៉នឲ្យនាង រាល់ពេលត្រលប់មកពីដំណើរកម្សាន្តវិញ។ ហើយជាការពិតទៅ ក្រុមគ្រួសារបស់នាង មានហាងសៀវភៅមួយ ដែលជាហេតុ ធ្វើឲ្យនាងចាប់អារម្មណ៍សៀវភៅនៃតុក្កតាដូរ៉េម៉ន តាំងពីវ័យក្មេងម៉្លេះ។

យ៉ាងណាមិញ ជុំវិញការរៀបចំតុបតែងពីធីភ្ជាប់ពាក្យខាងលើ មិនបានចំណាយប្រាក់ច្រើនឡើយ ហើយពួកគេទាំងពីរ នឹងរៀបអាពាហ៍ពិពាហ៍ក្នុងខែកក្កដាខាងមុខនេះ ដោយតុបតែងមានតុក្កតាដូរ៉េម៉នទៀតផងដែរ៕

សូមទស្សនារូបភាពខាងក្រោម៖