បរទេស៖ វត្តមាន European Super League ក្នុងរយៈពេលពីរថ្ងៃចុងក្រោយនេះបានធ្វើឲ្យកក្រើកពិភពបាល់ទាត់ និង មានភាពច្របូកច្របល់រវាងសហព័ន្ធUEFA, FIFA និង សមាគមន៍ក្រុមបាល់ទាត់ទាំង១២ដែលបានចូលរួមសហការ រួមទាំងការមិនពេញចិត្តពីអ្នកស្នេហាវិស័យកីឡាលើពិភពលោកផងដែរ ប៉ុន្តែឥឡូវនេះវាប្រហែលជាត្រៀមខ្លួនរួចរាល់ក្នុងការស្លាប់និងបាត់ខ្លួនទៅវិញក្រោយពីក្រុមកំពូលៗទាំង៦នៅចក្រភពអង់គ្លេសបានសម្រេចចិត្តមិនបន្តការចូលរួម និងដកខ្លួនចេញពីពានរង្វាន់មួយនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការតវ៉ាបានផ្ទុះឡើងនៅពាសពេញពិភពលោកបន្ទាប់ពីក្លិបចំនួន ១២ បានប្រកាសពីការចូលរួមជាមួយ Super League ប៉ុន្តែបន្ទាប់ពីក្រុមមេឃខៀវ Manchester City និងតោខៀវ Chelsea បានសម្រេចដកខ្លួនចេញ នោះក្រុមបិសាចក្រហម Manchester United, Arsenal, Liverpool និង Tottenham ក៏សម្រេចចិត្តដកខ្លួនតាមក្រុមមេឃខៀវ និង តោខៀវផងដែរ។
តួយ៉ាងក្រុមមេឃខៀវ Manchester City បានចេញលិខិតផ្លូវការមួយទាក់ទងនឹងការដកខ្លួនចេញពីSuper Leage ខណៈតោខៀវChelsea ក៏បានប្រកាសពីការចាកចេញរបស់គេផងដែរ ក្រោយពីមានពាក្យចចាមរាម និង គុណវិបត្តិនៃការបង្កើតពាននេះឡើង។
មិនតែប៉ុណ្ណោះក្រុមកាំភ្លើងធំArsenal ក៏បានបង្ហោះសារតាមរយៈបណ្តាញសង្គម Twitter ប្រកាសអំពីការចាកចេញពីពានរង្វាន់មួយនេះដែរ ខណៈដែលហង្សក្រហម Liverpool និង Manchester United ក៏បានជូនដំណឹងជាផ្លូវការណ៍អំពីការមិនបន្ត និង ដកខ្លួនចេញពីពានរង្វាន់នេះផងដែរ។
ក្រៅពីនេះទៀតលោកDaniel Levy ប្រធានក្លិបTottenham Hotspur ក៏បានប្រកាសពីគោលជំហរបស់គាត់ក្នុងការដកខ្លួនចេញពី Super League ផងដែរ។
ហេតុផលទាំងអស់នេះជាកត្តដ៏ធំមួយក្នុងការបរាជ័យមួយរបស់ European Super League ដែលពិបាកក្នុងការដំណើរការទៅបានដោយសារការដកខ្លួនរបស់ក្រុមកំពូលៗទាំង៦នៅចក្រភពអង់គ្លេស៕
ប្រភព៖ MARCA