វ៉ាក់សាំងស៊ីណូវ៉ាក់ ដែលកម្ពុជាទិញ ៥០ម៉ឺនដូសទៀត នឹងដឹកមកដល់កម្ពុជា​ ថ្ងៃស្អែក

ភ្នំពេញ៖​  ស្ថានទូតចិនប្រចាំនៅកម្ពុជា បានប្រកាសឱ្យដឹងនៅព្រឹកថ្ងៃទី១៦ ខែមេសា ឆ្នាំ២០២១នេះថា វ៉ាក់សាំងស៊ីណូវ៉ាក់ចំនួន ៥០ម៉ឺនដូស ដែលកម្ពុជាបញ្ជាទិញ នឹងដឹកមកដល់កម្ពុជានៅថ្ងៃទី១៧ ខែមេសា ស្អែកនេះហេីយ។

ក្នុងនោះ​ ស្ថានទូតចិន បានគូសបញ្ជាក់ថា ទោះបីជាប្រទេសចិនស្ថិតក្នុងស្ថានភាពដែលមានតម្រូវការវ៉ាក់សាំងក៏ដោយ ក៏នៅតែបន្តផ្តល់ទៅតាមតម្រូវការបញ្ជាទិញរបស់ភាគីកម្ពុជាដែរ។ នេះបានបង្ហាញយ៉ាងច្បាស់អំពីចំណងមិត្តភាពដែកថែបប្រៀបដូចបងប្អូនរវាងប្រទេសទាំងពីរ។

គួរបញ្ជាក់ផងដែរ នេះជាវ៉ាក់សាំងដែលបញ្ជាទិញលើកទី២ហើយ ដែលនឹងដឹកមកដល់កម្ពុជា ខណៈដែលវ៉ាក់សាំងស៊ីណូវ៉ាក់ទិញលើកទី១ ចំនួន ១.៥លានដូស បានដឹកមកដល់កម្ពុជាកាលពីថ្ងៃទី២៦ ខែមីនា ឆ្នាំ២០២១កន្លងទៅ។

សម្តេចតេជោ ធ្លាប់បានបញ្ជាក់ថា ខែមេសា នេះកម្ពុជា ទទួលបានវ៉ាក់សាំង ៥០ម៉ឺនដូស ខែឧសភា ចំនួន ១លាន ៥សែនដូស ខែមិថុនា នឹងមកដល់ចំនួន ៣លានដូស ខែកក្កដា នឹងមកដល់ ២លានដូស ខែសីហា នឹងមកដល់១លានដូស៕