រដ្ឋបាលខេត្តកណ្ដាល សម្រេចផ្អាកការលក់គ្រឿងស្រវឹងគ្រប់ប្រភេទ និងការទទួលទានតាមហាងផ្សេងៗ ជាបណ្ដោះអាសន្ន

កណ្ដាល៖ យោងតាមសេចក្ដីជូនដំណឹងរបស់ រដ្ឋបាលខេត្តកណ្ដាល នៅថ្ងៃទី ១២ ខែមេសានេះ បានឱ្យដឹងថា រដ្ឋបាលខេត្ត សម្រេចអនុវត្តវិធានការរដ្ឋបាលជាបណ្តោះអាសន្ន ចំពោះការផ្អាកការលក់គ្រឿងស្រវឹងគ្រប់ប្រភេទ និងការផ្អាកការទទួលអតិថិជនឲ្យចូលមកទទួលទានក្នុងភោជនីយដ្ឋាន អាហារដ្ឋាន តូបលក់អាហារ ហាងកាហ្វេ ហាងភេសជ្ជ: និងអាជីវកម្មផ្នែកអាហារ និងភេសជ្ជ:គ្រប់ប្រភេទ ប៉ុន្ដែអាចប្រកបអាជីវកម្មជាវេចខ្ចប់បាន។

សេចក្ដីសម្រេចនេះធ្វើឡើង គឺដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ ចាប់ពីថ្ងៃទី ១២ ដល់ថ្ងៃទី ១៨ ខែមេសា ឆ្នាំ២០២១។ អាស្រ័យដូចនេះ សូមបងប្អូនប្រជាពលរដ្ឋចូលរួមអនុវត្តតាមខ្លឹមសារ ដែលបានចែងក្នុងសេចក្ដីសម្រេចនេះឱ្យបានខ្ជាប់ខ្ជួន និងបន្ដអនុវត្តវិធានការ «៣កុំ ៣ការពារ» បន្ដទៀត៕