ពិត​ជា​គួរ​ឲ្យ​សង្វេគ​ណាស់! ជំងឺ​កូវីដ១៩​​បាន​​ឆក់​យក​​ជីវិត​​អ្នក​ម្តាយ​ជា​ទី​ស្រលាញ់​​របស់ វី ឌីណែត

ភ្នំពេញ៖ យោងតាមបណ្តាញសង្គម​ហ្វេសប៊ុករបស់កញ្ញា វីឌីណែត ក្នុងថ្ងៃទី ១៩ ខែមិនា ឆ្នាំ២០២១ នេះបានបង្ហោះ​សារដ៏ក្រៀមក្រំមួយ ដែលអមជាមួយរូបភាពប៉ុន្មានសន្លឹកជាមួយអ្នកម្តាយ ដោយអ្នកស្រី ងួន សុផាន្នី ជាម្តាយបង្កើត​របស់តារាចម្រៀងរូបស្រស់នេះបានទទួលមរណភាពនៅមុននេះបន្តិចហើយ ដោយអ្នកស្រីមានជំងឺប្រចាំកាយ និង​បាន​​ឆ្លង​ជំងឺដែលកំពុងតែរាតត្បាតដ៏កាចសាហាវ កូវីដ ១៩ ពីកូនស្រីជាទីស្រលាញ់ថែមទៀតផង។

ជាក់ស្តែងកាលពីម្សិលមិញក្រុមគ្រួសារតារាចម្រៀងរូបនេះ និងឪពុកដែលជាតារាចម្រៀងជើងចាស់ លោក ហួរ ឡាវី ក៏បានបង្ហោះ និងសូមបួងសួងទៅដល់វត្ថុសក្កសិទ្ធតាមបណ្តាញសង្គមហ្វេសប៊ុកឲ្យអ្នកម្តាយ និងប្រពន្ធជាទី​ស្រលាញ់​​​ឆាប់ជាពីជំងឺ និងឆ្លងផុតពីគ្រោះថ្នាក់ដ៏កាចសាហាវដែលកំពុងតែសម្រាកព្យាបាលនៅក្នុងបន្ទប់ ICU នៃមន្ទីពេទ្យ ខែ្មរ-សូវៀត។ ប៉ុន្តែទោះបីជាយ៉ាងណាក៏ដោយ អ្នកម្តាយជាទីស្រលាញ់របស់កញ្ញាមិនអាច​គេចផុត​បាននោះទេ ដោយបានទទួលមរភាពក្នុងថ្ងៃនេះហើយ។

អ្វីដែលគួរឲ្យសង្វាកចិត្តជាពន់ពេកនោះ ដោយសារតែបច្ចុប្បន្នមានជំងឺរាតត្បាតនៃជំងឺមួយនេះ ទើបធ្វើឲ្យកញ្ញា វី ឌីណែត និងអ្នកម្តាយបានឆ្លងជំងឺមួយនេះ ហើយវាក៏បានឆក់យកជីវិតអ្នកម្តាយជាទីស្រលាញ់មួយរូបរបស់កញ្ញា ដោយគ្មានការស្តាយស្រណោះថែមទៀតផង។ មិនត្រឹមតែប៉ុណ្ណោះសាច់ញាតិ និងលោកឪពុកជាទីស្រលាញ់មិន​បានធ្វើពិធីបុណ្យសពទៅតាមប្រពៃណីបាននោះទេ ហើយណាមួយកញ្ញាក៏កំពុងតែសម្រាកព្យាបាល និងចូលរួម​ទប់ស្តាត់នៅក្នុងសណ្ឋាគារ The Great Ducke ដែលជាមន្ទីពេទ្យសម្រាប់ព្យាបាល ពិនិត្យ និងថែទាំជំងឺកូវីដ ១៩ ៕​

សូមទស្សនានូវរូបភាពខាងក្រោមនេះ៖