អង់គ្លេស៖ អ្នកចាត់ការទូទៅក្រុមមេឃខៀវ Manchester City លោក Pep Guardiola បានផ្ដាំផ្ញើរទៅលោក Jose Mourinho ថា កេរ្ដិ៍ឈ្មោះ មិនអាចជួយគាត់ឲ្យរួចផុតពីការបណ្ដេញចេញរបស់ក្លិប មាន់ខ្នាយមាស Tottenham Hotspur នោះទេ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កៅអីរបស់លោក Mourinho នៅ Spurs កំពុងឡើងកម្ដៅ បន្ទាប់ពីលោក ដឹកនាំក្រុមបរាជ័យដល់ទៅ៣លើក ក្នុងចំណោម៤ប្រកួតចុងក្រោយ។ មិនត្រឹមតែប៉ុណ្ណោះ ក្លិបដែលមានមូលដ្ឋាន នៅភាគខាងជើងទីក្រុងឡុងដ៍មួយនេះ ក៏ទើបធ្លាក់ចេញពីពានរង្វាន់ FA Cup ក្រោមថ្វីជើងក្រុមស្ករគ្រាប់ Everton កាលពីពាក់កណ្ដាលសប្ដាហ៍នេះផងដែរ។
ជាមួយគ្នានេះ ដោយក្ដីបារម្ភខ្លាចលោក Mourinho ជ្រុះបាត់តំណែង លោក Pep ដែលជាគូប្រជែងរាប់សិបឆ្នាំ បានប្រាប់ឲ្យគ្រូបង្វឹកសញ្ជាត់ព័រទុយកាល់ ស្វែងរកជ័យជម្នះឲ្យក្រុមឡើងវិញ ដើម្បីរក្សាការងារនៅ Spurs ។
លោក Pep បានថ្លែង មុនការប្រកួតទល់នឹងក្រុម Spurs នៅយប់នេះថា៖
វាពិតជាលំបាកណាស់នៅទីនេះ (ប្រទេសអង់គ្លេស) គ្មានពេលវេលារង់ចាំយើងទេ។ អ្នកត្រូវតែឈ្នះ។ ដើម្បីទទួលបានលទ្ធផលល្អ អ្នកត្រូវចេះ បញ្ចុះបញ្ចូលកីឡាកររៀងរាល់ថ្ងៃ នេះជាវិធីល្អបំផុត។ នៅទីនេះ តែងមានសម្ពាធរាល់ថ្ងៃ លើស្មាលអ្នកចាត់ការដូចជាពួកយើង។
គ្រូបង្វឹកសញ្ជាតិអេស្ប៉ាញបានបន្ថែមទៀតថា៖
អ្នក ( Mourinho) ត្រូវមានអារម្មណ៍ខ្លាចាញ់ ខ្លាចការព្រមាន។ ត្រូវរីករាយនឹងជ័យជម្នះ រួចគិតគូពីការប្រកួតបន្ទាប់ទៀត។ នេះជាវិធីតែមួយគត់ ដើម្បីឈរជើង ក្នុងការងារមួយនេះ។ បង្ហាញម្ដងហើយម្ដងទៀត ថាអ្នកអាចធ្វើការងារនេះបាន ប្រសិនបើអត់ទេ ប្រាកដណាស់អ្នកនឹងត្រូវដកចេញ។
គួរបញ្ជាក់ដែរថា ក្រុម Man City នឹងត្រូវបើកទ្វារផ្ទះរបស់ខ្លួន កីឡដ្ឋាន Etihad ទទួលស្វាគមន៍ក្រុមភ្ញៀវ Spurs យប់នេះ វេលាម៉ោង ១២:៣០នាទីរំលងអធ្រាត្រ ដែលជាជំនួបក្របខណ្ឌ Premier League សប្ដាហ៍ទី២៤៕
ប្រភព៖ mirror
Bong I.T