អង់គ្លេស៖ ឆ្មាមួយដែលមានឈ្មោះថា «Oscar» ត្រូវបានអ្នកដែលយកទៅចិញ្ចឹម ប្រគល់មកឲ្យមណ្ឌលថែរក្សាសត្វវិញជាលើកទី៣ ដែលពត៌មាននេះបានធ្វើឲ្យអ្នកប្រើប្រាស់ប្រព័ន្ធអ៊ឺនធីណាត ភាគច្រើនមានការអាណិតអាសូរខ្លាំងមែនទែន។
ឆ្មាដ៏កំសត់នេះ មានអាយុជាង ១០ឆ្នាំ ដែលត្រូវបានគេមើលថែនៅមណ្ឌលថែរក្សាសត្វមួយ
ដែលមានឈ្មោះថា RSPCA animal shelter នាទីក្រុង
Stretton ប្រទេសអង់គ្លេស។ អ្វីដែលគួរឲ្យកំសត់ នោះគឺ នេះជាលើកទី៣ហើយ
ដែលអ្នកយកទៅចិញ្ចឹមបានយកត្រលប់មកវិញ ដោយសារតែឆ្មា Oscar នេះកាចពេកដោយខាំម្ចាស់ថ្មីណាដែលយកវាទៅចិញ្ចឹមជាញឹកញាប់។
ថ្មីៗនេះសារពត៌មានមួយរបស់ប្រទេសអង់គ្លេស ឈ្មោះ StaffordshireLive បានហៅឆ្មាក៏កំសត់នេះថា “that cat that no-one wanted” ដែលមានន័យថា “ឆ្មាមួយដែលគ្មាននរណាចង់បាន” ក៏ដោយសារតែ ត្រូវបានគេបដិសេធ ជាច្រើនលើកច្រើនសារនេះឯង។
តែបើតាមការបញ្ជាក់ពីបុគ្គលិកនៅមណ្ឌលដែលឆ្មានេះកំពុងរស់នៅ បានឲ្យដឹងថា Oscar ជាឆ្មាល្អ និងរាក់ទាក់ ដែលវាចំណាយពេលទាក់ទាញការចាប់អារម្មណ៍ពីបុគ្គលិកនៅទីនោះយ៉ាងគួរឲ្យស្រលាញ់។ បន្ថែមពីនេះ បុគ្គលិកនៅទីនោះបានបញ្ជាក់ទៀតថា ឆ្មា Oscarនេះ ពេលខ្លះ បង្ហាញពីភាពកាចរបស់ខ្លួនបន្តិចបន្តួច តែភាគច្រើន ជាឆ្មាមួយដែលគួរឲ្យស្រលាញ់ខ្លាំងណាស់។
“អ្នកដែលយកទៅចិញ្ចឹមគួរតែរៀនយល់ពីគាត់ ហើយអនុញ្ញាត ឲ្យគាត់ធ្វើអ្វីដែលគាត់ចង់ធ្វើ ដោយមិនដាក់សំពាធលើគាត់ នោះយូៗទៅ ភាពកាចរបស់គាត់នឹងត្រូវបានកាត់បន្ថយបន្តិចម្តងៗហើយ”។ នេះជាការបញ្ជាក់បន្ដពីអ្នកមើលថែរនៅមណ្ឌលនោះ៕
ចង់ជ្រាបកាន់តែច្បាស់ សូមទស្សនារូបភាពខាងក្រោម៖