អ្នកគាំទ្ររបស់ Chelsea វាយប្រហារកីឡាករម្នាក់នេះដោយចោទថាជាដើមហេតុធ្វើឲ្យ Lampard ត្រូវក្លិបបណ្ដេញចេញ

អង់គ្លេស៖ ផ្ទុះហេតុការណ៍ដ៏គួរឲ្យភ្ញាក់ផ្អើលមួយពេលអ្នកគាំទ្រជាច្រើននាក់របស់ក្លិបតោខៀវ Chelsea បានធ្វើការវាយប្រហារលើខ្សែការពារ Antonio Rudiger ក្នុងគណនីបណ្ដាញសង្គមរបស់គេព្រោះគិតថាគេនេះហើយជាមូលហេតុធ្វើឲ្យលោកគ្រូបង្វឹក Frank Lampard ត្រូវបណ្ដេញចេញពីតំណែងកាលពីថ្ងៃទី២៥ខែមករាកន្លងទៅនេះ។

យោងតាមការរាយការណ៍គឺខ្សែការពារសញ្ជាតិអាល្លឺម៉ង់ម្នាក់នេះបានបង្កបញ្ហាដូចជាឈ្លោះប្រកែកគ្នាជាមួយនឹងប្រធានក្រុម Cesar Azpilicueta ថែមទៀតផង។

Rudiger មិនសូវបានបង្ហាញមុខលើទីលានឡើយក្នុងរដូវកាលនេះដោយចំណាយពេលអង្គុយកៅអីបម្រុងច្រើនជាងបានចូលលេង ហើយអ្នកគាំទ្រភាគច្រើនរំពឹងទុកថាកីឡាករវ័យ២៧ឆ្នាំរូបនេះនឹងចាកចេញពីទឹកដីកីឡដ្ឋាន Stamford Bridge នៅរដូវក្ដៅខាងមុខ។

យ៉ាងណាមិញលោកគ្រូ Frank Lampard មិនដាក់ឈ្មោះឲ្យគេចូលប្រកួតច្រើនប្រកួតដែរដោយយកខ្សែការពារ Thiago Silva និង Kurt Zouma មកជំនួសកន្លែងដែលនោះហើយបានបង្កក្ដីតានតឹងរវាងកីឡាករនិងកីឡាករក្នុងបន្ទប់ផ្លាស់សំលៀកបំពាក់។ Rudiger បានឈ្លោះទាស់ទែងគ្នាជាច្រើនដងជាមួយប្រធានក្រុម Cesar Azpilicueta កំឡុងពេលហ្វឹកហាត់ពេលប្រធានក្រុមរូបនេះព្យាយាមចូលមកដោះស្រាយបញ្ហាកុំឲ្យមិត្តរួមក្រុមមើលមុខគ្នាមិនចំ ដែលជម្លោះនេះបានបង្កភាពវឹកវរដល់ក្នុងក្រុម។

ដូច្នេះហើយទើបអ្នកគាំទ្រជឿថា Rudiger គឺជាមេបញ្ហានិងជាដើមចមនាំឲ្យលោកគ្រូបង្វឹក Lampard ត្រូវបណ្ដេញចេញនិងបាននាំគ្នាប្រើប្រាស់ពាក្យរិះគន់វាយប្រហារទៅលើកីឡាករម្នាក់នេះតាមគណនីបណ្ដាញសង្គម Instagram។

Antonio Rudiger ធ្លាប់បានបង្ហោះរូបភាពរបស់គេលេងឲ្យ Chelsea ក្នុងការប្រកួតទល់នឹង Fulham ដោយភ្ជាប់ជាមួយសារថា៖

ប៉ុន្តែអ្នកគាំទ្រក្លិប Chelsea បានចូលទៅសរសេរសាររិះគន់អាក្រក់ៗនិងអ្នកខ្លះថែមទាំងសុំឲ្យគេចាកចេញពីក្លិបទៀតផងដែល Comment មួយក្នុងនោះនិយាយថា៖

ហើយ Comment នោះទទួលបានការគាំទ្រពីសំណាក់អ្នកគាំទ្រផ្សេងទៀត មិនត្រឹមតែប៉ុណ្ណោះអ្នកគាំទ្រខ្លះបានវាយប្រហារដោយប្រើសញ្ញា Emoji រូបពស់ ក្នុងន័យបញ្ជាក់ថា Rudiger ជាអសិរពិសដែលរមិលគុណនឹងលោកគ្រូ Lampard ព្រមទាំងមិត្តរួមក្រុម។

អ្នកគាំទ្រ Chelsea គិតថា Rudiger មិនបានផ្ដល់ប្រយោជន៍អ្វីដល់ក្លិបនោះឡើយហើយថែមទាំងបង្កជម្លោះផ្ទៃក្នុងមិនចេះចប់មិនចេះហើយប៉ុន្តែនេះមិនមែនជាលើកទីមួយទេដែលពួកគេទម្លាក់កំហុសទៅលើកីឡាករព្រោះកាលលោកគ្រូបង្វឹក Jose Mourinho ត្រូវបណ្ដេញចេញ ពួកគេក៏តាមរករឿង Eden Hazard ,Cesc Fabregas និង Diego Costa ដែរ៕

ប្រភព៖ dailymail