លិខិតបញ្ជាក់ដ៏កម្រមួយរបស់គ្រូពេទ្យ បានបង្ហាញពីអាការៈជំងឺរបស់ណាប៉ូឡេអុង មុននឹងគាត់ទទួលមរណភាព

អាមេរិក៖ លិខិតដ៏កម្រមួយដែលសរសេរដោយវេជ្ជបណ្ឌិតដែលបានព្យាបាល ណាប៉ូឡេអុង បូណាប៉ាត បានបង្ហាញពីអាការៈដែលមេទ័ពរូបនេះហើយក៏ជាអធិរាជបារាំងផងដែរ បានទទួលរងនូវជំងឺនិងការឈឺចាប់ក្នុងរយៈពេលប៉ុន្មានឆ្នាំ មុននឹងគាត់ស្លាប់។ លិខិតនោះចុះថ្ងៃទី៤ ខែមិថុនា ឆ្នាំ១៨១៨ ត្រូវបានសរសេរដោយគ្រូពេទ្យវះកាត់ជនជាតិអេឡង់ លោក Barry Edward O'Meara ដែលបានព្យាបាល ណាប៉ូឡេអុង នៅពេលដែលគាត់កំពុងនិរទេសខ្លួន​ នៅលើកោះដាច់ស្រយាលអាត្លង់ទិកខាងត្បូង St. Helena។

សំបុត្រមួយនេះបានបង្ហាញពីសុខភាពទ្រុឌទ្រោមរបស់ ណាប៉ូឡេអុង ដែលគាត់កំពុងទទួលរងការឈឺសន្លាក់យ៉ាងធ្ងន់ធ្ងរ រួមទាំងឈឺក្បាល ឈឺចាប់នៅដៃផ្នែកខាងស្ដាំរបស់គាត់ គ្រុនក្ដៅគួរឲ្យកត់សម្គាល់ ជីពចរលោតញាប់ ការថប់អារម្មណ៍និងមានសម្ពាធ។ នៅក្នុងលិខិតមួយនេះដែលត្រូវបានដាក់លក់ដេញថ្លៃដោយ Heritage Auctions នៅរដ្ឋ Texas ទៅឲ្យជនជាតិអង់គ្លេសម្នាក់ដែលមិនបញ្ចេញឈ្មោះ ក្នុងតម្លៃ២,០០០ដុល្លារ ក៏មានបញ្ជាក់ផងដែរថា លោកគ្រូពេទ្យ O'Meara ក៏បានដកធ្មេញខាងឆ្វេងផ្នែកខាងលើរបស់ ណាប៉ូឡេអុង ចេញ បន្ទាប់ពីរូបគាត់មានអាការៈឈឺធ្មេញ។

បើយោងតាមក្រុមប្រវត្តិវិទូបានឲ្យដឹងថា អធិរាជបារាំងរូបនេះនិងលោកគ្រូពេទ្យ O'Meara គឺជាមិត្តភក្ដិនឹងគ្នា ដែលក្រោយមករូបគាត់បានក្លាយជាគ្រូពេទ្យវះកាត់ជាន់ខ្ពស់ នៅលើនាវាចម្បាំង HMS Bellerophon នៅពេល ណាប៉ូឡេងអុង បានចុះចាញ់នៅឆ្នាំ១៨១៥ បន្ទាប់ពីការបរាជ័យរបស់ ណាប៉ូឡេអុង នៅឯសមរភូមិ Waterloo។

ប្រវត្តិវិទូបាននិយាយថា ណាប៉ូឡេអុង បានស្នើសុំឲ្យលោក O'Meara ធ្វើជាវេជ្ជបណ្ឌិតផ្ទាល់ខ្លួនក្នុងអំឡុងពេលនិរទេសខ្លួន។ រដ្ឋាភិបាលអង់គ្លេសបានបញ្ជាឲ្យលោក O'Meara វិលត្រឡប់មកវិញ នៅក្នុងខែកក្កដា ឆ្នាំ១៨១៨។ ណាប៉ូឡេអុង ដែលគ្រប់គ្រងប្រទេសបារាំងអស់រយៈពេល១៥ឆ្នាំ បានទទួលមរណភាពនៅលើកោះ St. Helena ក្នុងឆ្នាំ១៨២១ ហើយត្រូវបានសាធារណជនជឿថា គាត់បានស្លាប់ដោយសារជំងឺមហារីកក្រពះ៕