អ៊ីតាលី៖ រោងសម្រាប់ចាក់វ៉ាក់សាំងជាច្រើនសង់ពីឈើរាប់រយត្រូវបានតាក់តែងដោយរូបផ្កា ដែលជានិមិត្តសញ្ញារស់រានឡើងវិញ ហើយវានឹងត្រូវបានដំឡើងនៅក្នុងប្រទេសអ៊ីតាលី ចាប់ពីខែមករា នៅពេលប្រទេសនេះចាប់ផ្ដើមចាក់វ៉ាក់សាំងការពារប្រជាជនរបស់ខ្លួន ពីជំងឺកូវីដ-១៩។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការរចនាសម្រាប់រោងទាំងនេះត្រូវបានបង្ហាញកាលពីថ្ងៃចន្ទ ដោយស្ថាបត្យករលោក Stefano Boeri ដែលរួមគ្នាជាមួយអ្នកពិគ្រោះយោបល់បានបង្កើតរូបសញ្ញានិងទិដ្ឋភាពនៃការចាក់វ៉ាក់សាំងរបស់ប្រទេសនេះ។ រោងបណ្ដោះអាសន្នចំនួន១,៥០០កន្លែង នឹងត្រូវបានរៀបចំឡើង នៅតាមទីលាននិងទីប្រជុំជននៃប្រទេសអ៊ីតាលី។ ពួកវានឹងមានផ្នែកខាងក្នុងជាឈើនិងរាងជាសំបកខ្យង ដែលមាននិមិត្តរូបផ្កានៅផ្នែកខាងក្រៅ។
លោក Boeri បាននិយាយថា៖ «ការមកទទួលវាក់សាំងគឺជាសកម្មភាពទំនួលខុសត្រូវរបស់ពលរដ្ឋ ការស្រលាញ់អ្នកដទៃ និងការរស់រានមានជីវិតឡើងវិញ។ ប្រសិនបើវីរុសនេះឃុំឃាំងយើងនៅក្នុងមន្ទីរពេទ្យឬផ្ទះសម្បែង វ៉ាក់សាំងនេះនឹងនាំយើងទៅរកជីវិតនិងធម្មជាតិដែលព័ទ្ធជុំវិញយើងវិញ។»
យោងតាមតួលេខប្រមូលដោយសាកលវិទ្យាល័យ Johns Hopkins University បានឲ្យដឹងថា ប្រទេសអ៊ីតាលីមានចំនួនអ្នកស្លាប់ដោយសារវីរុសកូរ៉ូណា ចំនួន៦៥,០០០នាក់ ដែលវ៉ាដាច់ចក្រភពអង់គ្លេសសម្រាប់អត្រាមរណភាពខ្ពស់ជាងគេបំផុតនៅអឺរ៉ុប៕